Jowai: Mynta ka sngi la pyndep ia ka lehniam ba khadduh eh ia ka khynnah skul kaba la shah pyniap dusmon hadien ba ki la dep sloit jubor ia ka jinglong sotti jong ka, ha ki runar ki bym pat lah satia ban ithuh.
Ia ka met jong katei ka samla la tep donburom mynta ka sngi ha u Lum jingtep ka Balang Catholic ha Pamrakmai ha ryngkat ka jingsynran ki paidbah na katei ka shnong bad na ki shnong ba marjan, ki nongialam ka Balang, ki nonghikai jong ka, ki paralok khynnah skul bad ki sengbhalang bapher bapher.
Katei ka khynnah kaba dang 16 snem ka rta ka la jah na iing ha ka sngi Thohdieng ba la dep bad la lap ia ka metiap jong ka ha ka janmiet ha ka sngi kaba buh na Ar Kilo thain Suntga kaba jngai kumba 20 km na ka Skul kaba ka pule.
Ha ka sngi Saitjain ka pynsah shimiet ia ka met jong ka ha katei ka jaka ba la lap ia ka met jong ka namar hap ban ap ia ki tnad pulit ka Crime Unit na Shillong nalor kiwei kiwei ki jingdonkam katkum ka ain.
Ia ka por Mortem la pyndep mynta ka sngi bad mar syndep, la kit noh sha iing ban pyndep ia ka niam ka rukom shwa ban rah sha Lum jingtep.
Kiba la ai jingkren ha shwa ka jinglehniam ba khadduh ki la pynrem ia kane ka jingjia bad ki la kyntu ruh ia ka bor pulit ban trei shitom ban thwet ia kum kine ki runar kiba pyntieng pynsmiej ia ki kynthei ki khynnah.
Pynrem jur ka Seng Kur Phawa Siangshai: Ka Sengkur Phawa Siangshai katkum u kyrwoh ba la phah da u President ka Sengkur u ma Helping Phawa ka la pynrem jur halor ka jingshah bthat jubor ia ka jingim jong ka khynnah skur ha ki riew runar ki bym pat lah ban ithuh satia.
Ka Sengkur Phawa Siangshai ka la pynpaw ruh ia ka jingsngewsih kaba khraw halor katei ka jingjia bad ka la phah ruh ia ka khubor Sngewlem sha ki ba haiing hasem jong katei ka khynnah mar syntip ia katei ka jingjia.
U President ka Sengkur u la iathuh ba na ka liang ka sengkur ba la mihkhmat da u President bad u Vice President nalor kiwei kiwei ki la leit mar mar ban pyntngen ia ki kmie ki kpa jong katei ka khynnah naduh ka miet sngi Saitjain bad sngi U Blei.
Na ka liang ka sengkur ka la kyntu ia ki bor pulit bad ia ka sorkar hi ba kan shimkhia ban phah tohkit bniah halor katei ka jingshah pyniap katei ka khynnah skur khnang ban ioh kem ia ki runar kiba donkti khnang ba ka iing bishar kan ioh ban ai ka jingpynsaja ia ki katkum ki kyndon ain jong ka ri.
U President ka SengKur Jowai Unit, u ma MK Siangshai uba la ai jingkren ha ka sngi leit ontep ia katei ka khynnah skul, u la pynrem jur ia ki runar ba la shim ia ka jingim jong ka nalor ba ki la leh kput ruh ia ka jonglong kynthei jong ka.
“Kum ka sengkur, ngi pynrem jur ia ki runar kiba donkti ban thombor ym tang ia kane ka khynnah hynrei ia kiwei ruh de ki kynthei ki khynnah kat haduh ba ka la wanrah ia jingtieng jingsyier ia ki kmie ki kpa bad ia ka imlang ka sahlang.
Shuh shuh na ka liang ka Sengkur ka la ong ba kan nym shong kli kti hynrei kan iai bud dien ia kane ka jingshah lehbein katei ka khynnah skul tad haduh ba ka la ioh ia ka jingbishar kaba hok.
Haba nga peit , kine ki jingjia ki iai jia lynter khlem sangeh ha ka ri baieid jongngi, ka jingiatiplem ka la duh noh , namar baka Ain kam don ia Kum kine katba kiwei pat ki kam ka Ain kadon , Lada don ka aiñ ban buh Kum kiwei ki state ne ri ba Lada lap iuno uno uba leh ban sdien phasi beit tang katta la kynjah kane ka kam dusmon . Kane kadei ka jingthmu basniew bad thmu khnang naduh ia dohnud ym kaba bakla , na kata ka daw dei ban don ka aiñ bapyrkhing ban nym Jia shuh , hynrei ynda jia , la sh kut tang jingpynrem na kiba bun bad kyntu Bor ka aiñ bad thwet bad pynsajia kut tang hangta bad jia pat man ka por, imat ladei ban don noh da ki aiñ shnong ia kane ka kam