Tuid ki Nongsynshar sha KHADC, kwah pynkylla 6th Schedule

Shillong, 4 Rymphang:
Da ki spah ngut ki Khlieh Nongsynshar jong ki Hima bad Elaka bapher bapher ha ryngkat ki Rangbah Shnong jong ki shnong bapher bapher mynta ka sngi ki la tuid sha Khasi Hills Autonomous District Council ban ai ia ki mat jingtyrwa jong ki halor ka jingpyn kylla thymmai ia ka 6th Schedule ryngkat kiwei pat ki mat ban ai jingmut ia ka District Council. La leit ban ia kren ia u CEM ka KHADC da katto katne ngut ki khlieh nong synshar hapoh ka jing ialam u bah John F Khar shiing, Chairman bad hadien katei u CEM u la pynlong ka jingialang bad baroh ki Khlieh nongsynshar kiba la wan sha u ha phyllaw ka District Council.
Haba kren sha ki nongthohkhubor , u bah John F Kharshiing u la ong ba ka ki Khlieh Nongsynshar ki la pynsngew ba ia ki ain Hima, Elaka ym dei ban pynlong salonsar tang da kawei ka ain, hynrei dei ban ithuh noh ia ki ain jong ki hima bad Elaka bapher bapher namar ba kawei ka Hima ka ia pher ka ain jong ka na kawei pat ka hima bad kumjuh ruh ka long ha ki Elaka.
U bah John u la ong ba haduh mynta napdeng 54 tylli ki Hima, Elaka hapoh ka Federation of Khasi State ki don tang lai tylli ki Hima kiba la don la ka jong ka ain, kata ka Hima Nongstoin, Langrin ba ka hima Maharam, katba kiwei pat kim don kata ka ain ba la ithuh da ka sorkar. U la ong ba wat ka hukum ka high Court kaba dang shu mih shen ruh kam treikam ha kitei ki lai tylli ki Hima kiba la don lypa ka ain.
Nalor kiwei pat ki mat kum ka Instrument of Accession and Annexed Agreement, kiwei pat ki mat ba ki Khlieh Nongsynshar ki la pynpaw ba dei ban don kawei ka komiti kaba ki dkhot jong ka kin long ki MDC, ryngkat ki dkhot jong ka Federation of Khasi State kumba la long ha ka EC ha ka por ba u bah Pynshngain N Syiem u la long u CEM na ka bynta ban ia kren ia ki bynta ba donkam hapoh District council kaba iadei bad ki hima/Elaka. U la buh jingkyrpad ha u CEM ba dei ban pynlong noh ia ka jingialang kyrpang hapdeng baroh ki MDC bad ki Khlieh Nongsynshar ban ia phylliew halor ka jingtyrwa pynkylla thymmai ia ka 6th Schedule. Ha katei ka jingiakynduh bad u CEM u bah John u la iathuh ba na ka liang ki Khlieh nongsynshar ki la pan ia ka draft ba ka KHADC ka la pynkhreh halor ka jingtyrwa ban pynkylla 6th Schedule khnang ba na ka liang jong ki kin ioh ban buddien bad ban peit ia kiwei pat ki jingduna.
Ha ka jingialang kaba la long ha phyllaw ka District council, na ka liang ki Khlieh nongsynshar la ai jingkren da u bah John F Kharshiing, u nongialam ka liang pyrshah u bah Pynshngain N Syiem, ki EM ka KHADC ba kynthup ia u bah K.P Pangniang, u bah Latiplang Kharkongor, u bah Teinwell Dkhar, u bah P.T Sawkmie, bah Adelbert Nongrum CEM.