Ki nongialam sengbhalang, ki riew sain pyrthei bad khamtam ki pulit, ki ju bat bor bad knieh ia ka bai kamai, ong ki ROT

Shillong: Hadien ba ki la sangah ia ki MLA, ha kane ka kynti ki rot, ki la sangah sa ia kawei ka seng, ka STIEH.

Ha ka jing pynshai, kaba la phah hynnin ka miet bad ba la thoh biang hi da ka ktien phareng, la iathuh khana shaphang ka jinglong ka imlang sahlang ki Khasi, ha kaba la ju tip da ka kyntien matriarchal society. “Kum ka khynnah kynthei, nga la pule ha ka skul Catholic bad la iathuh ia nga, ba dei tang ki kynthei dakaid, kiba ju im ha ka sex. La ong ruh ba la sin ia kitei ki kynthei, da ka kyntien tusok bad ka daw, ka long ba kiba bun ki shynrang, ki leit thiah lang bad ki. Hadien kata, ka saphriang ka khubor, ia ki shynrang kiba la iathiah lang bad nga bad hangta, nga sngewthuh ba balei ha ka dustur Khasi, ba ki buhrieh bha ia ka jinglong ka met ki kynthei, ka jingkwah jongki bad ia ka jing donkam jongki ia ka sex”, ong katei ka kyrwoh.

“Ha ka por ba nga wan phai sha Shillong, kawei na ki nongtrei sengbhalang, ka kren shai ba ki kynthei, ki don ia la ka hok, ban rai ia la ka jingim. Katei ka dei ka jingsdang jong ka jingim jongnga, ba ngan kamai pisa, ialade, da ka sex bad ba kiwei ki paralok ba im ha katei ka kam, kin lah ban ia sngewthuh jingmut lang” ong shuh ka kyrwoh.

“Shiphew snem mynshwa, nga sngewthuh ia ka jingdonkam ban don noh da ka seng, kaba peit ia ka jingbha ki thei die met, ha kaba wat ka Amnesty International ruh ka ong ‘Sex Workers rights are Human Rights’. Nga lum lang ia baroh ki kynthei kiba kamai na ka kam die met bad ha u snem 2011, la pynlong ia ka jing ia kynduh jongngi bad la iakren halor ka jingshah lehbein jongngi, ha ki nongialam sengbhalang, ki riew sain pyrthei bad khamtam ki pulit, kiba kem bad ki bat tnga jubor ia ngi bad nangta, ki sa knieh lut ia ka pisa, kaba ngi ioh kamai”.

Katei ka kyrwoh, kam iahap ia ka jingong jong ka STIEH, ba dei ban sangeh noh ia ka kam die met, kaba ialam sha ka kam die jubor ia ki kynthei bad la ong ba ka kam die met, ka dei kaba ka kynthei kaba la heh la san, ka leh da ka mon lajong.
Ka la dei ka por ban sangeh ia kine ki kam bishar briew, hynrei ban iatrei lang bad ki thei die met bad ki hok, kiba ki donkam ha ka jingim kaba man ka sngi jongki, ong ka kyrwoh ba la phah lyngba ka kong

I. Kharmuti (President), P. Mylliemngap (General Secretary) & D. Mawlong (Publicty Secretary),

Rot Association Of Meghalaya (RAM)
Headquarters: Nongmynsong, Shillong – 793019
Meghalaya, East Khasi Hills – India.