Shillong:Ka Liewlong SC ka la rah ia ka nam lahduh jong ka lympung 1st Pomlakrai Football League 2020-21, ba la pynlong da ka Pomlakrai SC ha ryngkat ka jingïatreilang bad ka Greater Nongkrem Youth Welfare and Development Organization (GNYW&DO), hadien ba ka la lah ban pynliem ia ka Umïew SC ha ka jingiakhun phainal lyngba ka jingiashut kol kynthei da 6-5 kol myn ha ka Sngi Saitjaiñ ha madan Um myrthong.
Ka jingiakhun phainal hapdeng kine ki ar tylli ki kynhun ialehkai, ha ka por ba la buh, ka la kut noh ha ka jingiakhaid khlem da don ba lah ban thep kol kaba la pynlong ia ki bor pyniaid ban rai pynshut kol kynthei ban rai ia ka lahduh bad ka kynhun ba wan ba ar jong kane ka lympung.
Ia ka jingiakhun phainal ban pynhap pyrda artad ia ka lympung la wan ban sakhi da ki hajar ngut ki paidbah ym tang na ka thaiñ Pomlakrai hynrei na ki shnong bad ki dong bapher bapher kiba don marjan ha ka jingiadonlang u Paiem Ainam Manik Syiem, Acting Syiem ka Hima Khyrim kum u Kongsan.
Kiwei kiba la donlang ki kynthup ia u Bah Wallamkupar Kharpran, Managing Director ka Ryntih Football Club, u Bah PT Passah, BDO ka Mylliem C&RD Block u samla rangbah Johnnystar Mawrie, President ka GNYW&DO, Bah Arphin Marbaniang, President ka Mylliem Lum Sports Association, ki nongialam shnong, ki nongkitkam ka Pomlakrai SC bad kiwei pat.
Ka jingiakhun ka la long kaba iakhaid bha, ha kaba ki rangialehkai na baroh liang ki la pyrshang ban sei ia ia ki buit ki bor ban ïoh thep kol hynrei baroh ki shu long lehnohei. Dei tad haduh ka jingpynshut kol kynthei ba ka Liewlong SC ka la ioh ban thep 6 kol katba ka Umïew SC ka la lah ban thep tang san kol.
Kum ban shu kdew ba kane ka lympung ialehkai ka long ruh ka rynsan na ka bynta ban jied ia ki samla ialehkai ha ka jingpynkhreh ka Pomlakrai SC ban leit ia aireng ha ka lympung phutbol mynta u snem ba la pyniaid da ka Shilllong Sports Association (SSA) ha madan Polo.
Ha ka jingialang sam khusnam, la ai ia ki khusnam shimet sha ki nongialehkai kiba la leh kai bha, thep kol bun eh bad nongap kol ba tbit eh jong ka lympung. Ka lahduh ha kane ka sngi ka la ïoh pdiang ia ka song pisa kaba T. 20,000/- ryng kat ka Running Trophy katba ka kynhun kaba wan ba ar ka la ïoh rah ia ka song pisa ba T.10,000/-.
Haba iadei bad u kongsan, kata I Acting Syiem, Paiem Ainam Manik Syiem, im dei jong ka Hima Khyrim, Hynrei jong ka Hima Mylliem. Khublei shibun.