Haduh T.51 klur, shah ram ki nonghikai SSA ha ka sorkar Jylla

Shillong:U myntri ba dei peit ia ka tnad pule puthi jong ka jylla, u bah Lahkmen Rymbui haba jubab ia ka jingkylli, kaba la wan rah da u bah George B Lyngdoh (Congress), ha kaba ia dei bad ka Arrear jong ki nonghikai SSA, Lower Primary bad Upper Primary school u la iathuh hapoh ka ingdorbar ba kaba dang sah ka long T.51.15 klur.

U myntri u la iathuh ruh na kane ka arrear ka dei namar ba la pynkiew ia ka tulop jong ki nonghikai SSA naduh ka 1tarik u Iaiong 2016 bad ka arrear baroh ka long T.89.51 klur, na katei ka sorkar ka la siew T.38.35 klur ia kane la siew ha u snem 2018, kumta kaba sah ka long sa T.51.15 klur.
Haba jubab ia ki jingkylli bynrap na liang jong u bah Lahkmen u la iathuh ruh ba ka sorkar jylla mynta ka dang ialeh ban wat ki lad ki lynti kumno ban ioh ban siew pyndep ia ka arear kaba dang sah jong ki nonghikai SSA.
U bah Lahkmen, haba jubab ia ka jingkylli u bah Adelbert Nongrum (KHNAM), u la iathuh ba ia ki nonghikai ha ki kolej kiba dei ha ka kyrdan jong ka jingsiew jong ka UGC, ka rta wad kam ka long haduh 32 snem bad na ka bynta ki riewlum bad ki rit paid la pynjlan da san snem.

U Myntri ba dei peit ia ka tnad khlaw u James K Sangma haba jubab ia ka jingkylli jong u bah Syntar Klas Sunn, ha kaba ia dei bad ka Meghalaya State pollution Control Board, na ka liang jong u myntri u la ong ba ka dei ka jingshisha ba la seng ia ka MSPCB ban ai jingmut ia ka sorkar.
Na ka liang jong u myntri u la jubab ruh ba ka jingai jingmut jong ka MSPCB ia ka sorkar, ka shong ha ka sorkar la kan pdiang ne em ia ka jingai jingmut, kam mut ba ka sorkar ka hap ban pdiang.