Pyni jingdom U Bah Adelbert, ba ka sorkar kam shim rai, ia ka rta thung kam sorkar

Shillong:U Myntri Rangbah ka jylla u Conrad K Sangma, haba jubab ia ka jingkylli ba la wan rah da u bah Nujorki Sungoh, UDP, u la ong ba ka sorkar ka dang bishar bniah ia kane ka jingdawa ban pynjlan ia ka rta thung kam.

Ka Dorbar Mang tyngka ka la khluit shiphang ha ka kynta ba buh jingkylli bad jubab, hadien ba u MLA ka North Shillong, u Bah Adelbert Nongrum u la pyni da ka jingdom ia ka Sorkar kaba la ong ba ka dang bishar ha kaba ia dei bad ka jingpynjlan ia ka rta thep kam ki samla ha ki tnat bapher bapher jong ka Sorkar.

Ha ka jingkylli bynrap, u Bah Adelbert u la pyni ia ka jingdom ba ki samla ki la shu sep ei ka por wad kam, da kaba ong ba ka mut aiu ba ka Sorkar ka dang bishar, ha kaba na ka liang u Conrad u la pynpaw ka jingbym sngewtynnad ia ka rukom wanrah jong u MLA ia ka jingkylli, da kaba ong ba u MLA um lah ban wan leh drama hapoh Ïing dorbar. Ha kane kajuh ka por la ïeng ruh u Symbud Myntri Rangbah uba la ong, ba u MLA haba u buh jingkylli u dei ban buh shwa ia ka jingsngew sharud.

Haba jubab ia ki jingkylli bynrap, u myntri rangbah ka jylla u la ong ba ka rta wad kam ha ka jylla ka long haduh 27 snem bad la pynjlan da san snem ia ki riewlum bad ki rit paid, hynrei ha ka kam pulit pat ka long haduh 21 snem, katba ia ka rta thungkam nonghikai pat la pynjlan sha ka 27 snem dei halor kane ka bynta ba ka sorkar ka dang hap ban bishar bniah ia kane ka bynta, namar ka rta kam dei ban ktah ia ki samla wad kam bad ha ka juh ka por kam dei ban ktah ia ka jingtrei kam jong ka sorkar, halor kane ka jingdawa ban pynjlan ia ka rta, wat kam ka sorkar ka dang bishar bniah.

Katkum ka jubab jong u Myntri Rangbah, ka rta thep kam ha ka Jylla haduh mynta ka long, na ka bynta ha ki ophis jong ka Sorkar Jylla hapoh 27 snem, ki doctor hapoh 41snem, Professor 32 snem, ha ka kam pulit na ka bynta ki Sub Inspector hapoh 27 snem katba ki constable hapoh 21 snem. Ha kajuh ka por u la iathuh ruh ba ka don ka jingpynkylla ha ki katto katne ki selection board, hynrei ka rta kaba long kyllum ban thep kam ha ka Jylla ka dei hapoh 27 snem.