Shillong:U bah Adelbert Nongrum, MLA jong ka KHNAM, ula iawer ia U Bah Lahkmen Rymbui, ban ia leit iaid swait noh shisien, ban leit peit da la ki khmat, ban lap dalade, ia ka jingdon ki kynthei die met ha Police Bazar.
Halor kane ka mat, U bah Nongrum, u ong “Lada phi sngewkhia shisha, kumta, sngewbha pyllait ia ka por jongphi, hadien ka por 10baje mynmiet, ngin iohi da la ki jong ki khmat ia ka jingshisha. Kane ka dei ka kam kaba khia, kumta, sngewbha, wat ia kren biria”.
Haba jubab U bah Rymbui, u iathuh ba u ruh, u shait leit sha katei ka jaka, ha kaba u ong “Nga shait leit sha katei ka jaka (9lad), ha shwa ka lock down, ba haba don ki dukan kiba ha rud surok, nga ju bam jingbam ha kitei ki dukan ha rud surok, hynrei ngam ju iohi, ia kiba kum kitei ki jingjia” bad u myntri, ula ong shuh “Ngi tip, ba ka khyndailad, ka dei ka jaka shaw briew, na ka bynta ban leit jingleit, ban shaw briew daki bos ne da ki taksi, hynrei, kam dei satia, ka jaka ban ia kit briew, na bynta ki kam khaii met”.
Na ka liang u myntri ka tnad kam pohing u la ong ba ka tnad pulit kan sa wad jingtip halor kane ka bynta bad ka sorkar ka la buh ruh ia ka ain Anti human trafficking ban khanglad ia kine ki kam beain.
Na ka liang jong u bah Adelbert u la buh ia ka jingkylli bynrap ba namar kane ka jaka ka hap hapoh ka constituency jong u, hato ka sorkar kan shim khia ia kane ka bynta shuwa ba kane ka jaka kan kylla long kum ki redlight area.
Halor kane, U bah Rymbui u la ong ba ka sorkar ka don ia ka jingkitkhlieh bad ka dei na kane ka daw ba la buh ia ka ain Anti human trafficking.
U Myntri u la ong ruh ba haduh mynta kam shem la don kano kano ka jingujor halor kane ka bynta bad ban tehlakam ia kane ka kam beain ka don kam ka jingiatreilang jong ki shnong ki thaw ban peit ngor bad ban ujor ruh ha ki pulit.
Na ka liang ka Dr Ampareen Lyngdoh MLA, ka la ai jingmut ia ka tnad pulit ba ki dei ban tohkit ia kane ka kam bad ba ka sorkar, kan wanrah ia ka jingtip, ha poh ka ingdorbar.
Na ka liang u myntri u la ong ba na ka liang ki pulit ki long ki ba peitngor halor kane kam beain bad ka sorkar ka shim khia ban tehlakam ia kane ka kam.
Phi don ban ong eiei?