Kwah ka sorkar Jylla, ia ka surok Wahkaji-Mawthabah

Shillong, 3 Rymphang:
Ka sorkar jylla ka la pan na ka KHADC na ka bynta ban aiti ia katei ka surok na Wahkaji sha Mawthapdah kaba dei jong ka Council, namar ba ka sorkar India lyngba ka tnad Road Transport and Highways ka la pynrung ban shna ia ka surok ba ar kali na Nong stoin sha Mawthabah kaba 68 km kaba la mang T. 470 klur.
Haba kren mynta ka sngi, sha ki nongthoh khubor u Executive Member ba peit ia ka tnad Mining and Geology jong ka Council, u Bah Donkupar Sumer, u la pynthikna ia kane ba ka sorkar jylla ka la phah ia ka jingthoh sha ka Council hynrei na ka liang ka Council kam pat shim ia ka rai namar ba kan sa shong da ka jingialang.
U la ong ba ka daw ka jingpan jong ka sorkar jylla ia katei ka surok, ka long ba ka sorkar pdeng ka la pynrung ia ka projek ban shna surok kaban ngiam ar tylli ar kali (two lane) shi sien iaid na Nongstoin sha Mawthabah.
U la iathuh ba kane ka surok ka dang don hapdeng ka jingshna haduh mynta bad na ka 20 km la dep siang rong tang 6.5 km bad sah sa 13 km eiei. Ia kane ka surok la bei pisa da ka UCIL ha ka jingmang kaba T. 38 klur ha u snem 2005 eiei.
U Bah Sumer u la ong ba ka jingsah kut khlem lah ban pyndep ia kane ka surok, ka dei namar ba ka UCIl ka sangeh ban bei pisa kaba dang sah sa T. 6 klur eiei.
“Ngi la ioh T. 32 klur na ka UCIL bad kaba khadduh kaba ka la ioh pdiang ia ka pisa na kane ka UCIL ka dei ha u Jymmang u snem ba la dep, kaba long T. 1.30 klur”, la ong u Bah Sumer.
U la ong ba ka Council ka dang thoh sha ka UCIL la ka dang don mon ne em ban pynlait pisa kaba dang sah na ka bynta ban shna pyndep ia katei kaba dang sah.
U la kyntait ia ka jingkynnoh ba ka la don ka jingpyndonkam bakla ia ka pisa ha ka jingshna ia katei ka surok kaba la wanrah ia ka jingpynslem.
“Ngi siew lut ia baroh ki bill jong ki kontraktor mar ia ioh ia ka pisa na ka UCIL”, la ong u Bah Sumer bad kyntait ba kam shym la don kano kano ka jingpyndonkam bakla ia ka pisa.
Ha kane ka sngi Nyngkong, u CEM, ki EM ka Council ki la pynlong ia ka jingleit jurip ia katei ka surok ban bishar bniah ia ka jingiaid ka kam bad ban iapyrkhat aiu ban leh hadien ba ka sorkar jylla ka la pan ban aiti sha ka sorkar na ka bynta ban shna ia katei ka surok two lane.