Bteng ka shah thngan ki nong hikai contractual, bym treh ka sorkar, ban pynrung kam biang

Shillong:Ki nonghikai contractual kiba hapoh ka lama jong ka Meghalaya Government Lower Primary School Contractual Teacher’s Association (MGLPSCTA) ki la rai ban sdang biang ia ka jingshah thngan ba khlem buh por hadien ba ka jingiakynduh jong ki bad u Additional Chief Secretary ka Sorkar Jylla u Bah Donald P. Wahlang ka long kaba khlem seisoh.

Mynta ka sngi ka jingleit iakren jong ki nongialam ka Megha laya Government Lower Primary School Contractual Teacher’s Association(MGLPSCTA) bad u Additional Chief Secretary ka Sorkar Jylla u Bah Donald P. Wahlang, kam shym la long ka ba seisoh hadien ba une u heh ophisar jong ka Sorkar Jylla um shym la lah satia ban ai ia kano kano ka jingkular halor ka jingdawa jong ki nonghikai contract ban pynrungkam biang ia ki, ha ki Government Lower Primary School.

Ha ka jingiakren bad ka Kong Banri Suchiang, kawei na ki dkhot jong ka MGLPSCTA ka la ong ba katkum ka jingong jong u Bah D P Wahlang u la ong ba ka sorkar kam lah ban thung biang ia ki, namar ba ki khlem pass ia ka Meghalaya Teacher Eligibility Test (MTET).
Ha ka sngi saitjain jong ka taiew ba la lah, na ka liang jong ki nonghikai, hapoh ka shatri jong ka MGLPSCTA, ki la weng noh ia ka jingshah thngan jong ki shipor tad ha ka 3 baje janmiet ban ap ia ka rai jong ka sorkar, hynrei namar ka jingbym seisoh ka jingiakren jong ki bad ka sorkar ki la shim biang ia ka rai ban bteng ia ka jingshah thngan ba khlem buh por ka jong ki.

Ka Kong Banri ka la ong “Ngin sdang biang ia ka jingshah thngan ba khlem buh por jong ngi namar ka sorkar ka khlem pdiang ia ka jingdawa jong ngi ha madan Malki, tad haduh ba ka sorkar kan da pyrkhat da kumwei pat”.
Haba jubab ia ka jingkylli la hato ki la ioh jingbit ne em na ka Deputy Commissioner (DC) ban pynlong biang ia ka jingiakhih, na ka liang jong ka kong Banri, ka la iathuh ba ka jingioh jingbit kan kut mynta ka sngi ha ka por 6 baje; te na ka liang jong ki kin sa pan biang ia ka jingbit. Ka la iathuh ruh ba ka jingshah thngan jong ki kan long kaba khlem buh por haduh ba kin da ioh ia ka rai ba ka sorkar kan ai kam biang ne thung kam biang ia ki.
Ha kaba iadei bad ka jingiakhih jong ki, la ka long kaba shong nongrim ne em namar ba ki khlem lah ban pass ia ka eksam MTET, na ka liang jong ka Kong Banri ka la ong “Ka jingiakhih bad jingdawa jong ngi ka long kaba shong nongrim namar ba ngi la hikai bun bun snem bad ia ka kontrak jong ngi ruh la pynthymmai beit na ka ophis ym dei ba ngi leit pynthymmai ma ngi”.

Ka ong ruh ba lada ha ka tnad MeECL ki bun ki nongtrei kontrak bad ki la don ruh ki eksamin na ka bynta jong ki bad ia kiba pass la ithuh da ka MeECL, hynrei kito kiba khlem pass ia ka eksam ruh ki dang ioh ban trei ia ka kam, “Ngi ruh ngi dawa na ka sorkar ban bteng ia ka jingtrei jong ngi lada ym lah ban ithuh namar ngi khlem pass ia ka MTET hynrei ba ngin lah ban bteng ia ka kam hikai jong ngi”, ong ka Kong Banri.

Kum ban shu pynkynmaw ki nonghikai kontrak kiba don haduh shihajar tam ki la pynlong da ka jingshah thngan kaba khlem pud sngi, hadien ba ki la shah weng noh na ka kam hikai skul ha shwa ba ka Sorkar Jylla kan pynrungkam da ki samla kiba la pas ia ka eksamin Meghalaya Teachers Eligibility Test (MTET).