Ka sorkar jylla, ka shim khia halor ka jing dawa ILP, ong U MR

Shillong:U MLA jong ka seng Congress, u bah Mayralborn Syiem, u la buh ia ka jingkylli ia ka sorkar MDA mynta ka sngi, halor ka mat, kaba dei bad ka Inner Line Permit.

Ha kaba jubab ia ka zero hour notice ba la wanrah da u MLA, u Myntri rangbah u la iathuh ba ka sorkar jylla, ka la shimkhia ia kane ka mat, ha kaba ki la kyntu ruh ia ka sorkar pdeng ban bishar bniah bad pyrkhat kyrpang ia ka jingtyrwa jong ka jylla. U Sangma u la iathuh ba haba sngap ia ka jingdawa jong ki sengbhalang ha ka jylla halor ban pyntreikam ia ka ILP, ka sorkar jylla ka la pynlong ia ki jingialang bad ki sengbhalang bad ki kynhun jong ki committee bapher bapher ban wad ia ki lad ki lynti ban weng ia ka jingeh na ka jingwanrung tuh ki bar jylla.

U Sangma u la pynkynmaw, ba ha ka 19 tarik u Nohprah 2019 ka ingdorbar ka la pdiang ia ka resolution halor ka ILP, ha kaba ia ka resolution la pdiang bad na ka liang jong ka sorkar jylla, ka kyntu ia ka Sorkar India ban pyntreikam ia ka ILP hapoh ka Bengal Eastern Frontier Regulation 1873 ha ka jylla Meghalaya bad la rah sha ka sorkar india ban pynkylla ia kiba donkam na kane ka Regulation ban pynrung ia ka jylla Meghalaya ha ka Preamble jong ka Bengal Eastern Frontier Regulation 1873 bad ia ka Resolution la dep ban phah sha ka Ministry of Home Affairs, jong ka sorkar ban bishar bniah India.

Halor ka Meghalaya Residents Safety and Security Act, 2016 u myntri rangbah u la iathuh ba halor ka MRSSA ka sorkar jylla ka la dep ban pdiang da ka Meghalaya Legislative Assembly bad la phah ban ioh ia ka jingmynjur na u Lat jong ka jylla ha ka 26 tarik u Nailur 2016.

U Sangma u la iathuh ba ka Meghalaya Residents Safety and Security (Amendment) Bill, 2020 la dep ban pdiang da ka Meghalaya Legislative Assembly ha ka 19 tarik u Lber 2020 bad la dep ban phah sha u Lat ka jylla ban ioh ia ka jingmynjur bad kane ka dang don hapdeng ka jingbishar bniah. U la bynrap ba ban pynthikna ban pyllait ia ka jylla baroh kawei na ka CAA, la pdiang ia ka resolution ILP ha ka Meghalaya Legislative Assembly bad ka sorkar jylla ka kyntu ia ka sorkar India ban pyllait ia ka jylla Meghalaya na ka jingpyntrei kam jong ka CAA na ki jaka ki bym hap ha ka Sixth Schedule. U Sangma u la iathuh ruh ba ka sorkar jylla ka la kyntu ia u Union Home Minister halor kine ki mat bad ka sorkar jylla ka dang ap ia ka jingmynjur jong ka sorkar India.Dang shen ha ka por ba u myntri kam poh iing, u la wan sha ka nongbah Shillong ka sorkar ka la ai ia ka dorkhas ha kaba iadei bad ka jingdawa ban pyntreikam ia ka ILP ha ka jylla Meghalaya.