Ka Bengal, ka jylla; tynjuh democracy

B.M.Lanong

Tip aiu kan jia bad shano kan poi, shitom ban iathuh lypa, hynrei ia ka Democracy, Synshar Paidbah ha Ri India, la buh mynta hakhmat ki paidbah West Bengal, kumno ba kin ialeh hi ia ka.

Ka jingjied ia ki 294 ngut ki MLA ha katei ka jylla West Bengal, yn pynlong noh shen. Yn sdang shuwa naduh ka 27 tarik mynta u bnai Lber (March) tang na ka bynta 30 tylli shuwa ki Constituency bad ter-ter haduh 8 sien, yn jied toit-toit na ka bynta ki 264 tylli kiwei pat kiba sah.
Baroh ki Seng heh, Seng rit, Seng tit kiba ju ialeh ki la sdang her sharum-shaneng, khamtam ki BJP kiba la wan her kum ki pukni naduh Delhi, ban weng noh ia ka Sorkar Trinamool jong ka Chief Minister Mamata Banerjee, kaba la synshar hi saw sien lynter kum ka CM, naduh ba ka la jop ha u snem 2001 haduh mynta, 20 snem kynthih.

Ka Election MLA 2016
To ngin ia peit kai ia ka ilekshon bala dep 2016, ka seng Trinamul AITC ka la ioh haduh 211 ngut ki MLA, Congress- 44 ngut, CPM- 26, ka BJP- 3, kiwei ki seng rit ki ia ioh lang 10 ngut; long baroh 294.
Ki hok synshar paidbah kiba buh ryntih hapoh ka Constitution ka ri India naduh ki por hyndai u Mahatma Gandhi, mynta ki la sdang troin noh, namar ki rangbah BJP naduh Delhi ki la dawa ba dei ban don noh tang kawei ka Ri India, kaban don tang kawei ka Niam bad kawei ka Ktien, kumta ter-ter.
Kaba la leh thymmai biang ha une u bnai Rymphang (Feb) ba la dep ha UP, ka kdew shai ia kitei ki jingthmu, haba ka ‘Sorkar BJP u Yogi ka la pynmih ia ka ain pyrkhing, bym dei shuh ban don ka jingpynkylla niam ia ki briew .
Wat ka Supreme Court ruh ka la leh ia kabym ju leh, ba ia ki poh jait Dalit, lada ki kylla jait, kin duh noh ia ki hok ba ki ju ioh.
Kine ki dei kita ki dak kiba ap ia ki jingkhniot bor ia ka Democracy bad dei namar kum kine ki daw, ki paidbah ka ri India ki kwah ba ka Seng Trinamool jong ka Mamata ha Bengal ka dang dei ban iai sah.

Ka Ri India Laitluid
U Mahatma Gandhi baiar mynsiem, ula iap da kaba shah siat pyllein-pyllein ha ki RSS Hindu hi, ha ka janmiet 30.01.1948 namar u thrang ban pynlong ia ka Ri India, kaba laitluid, kaban don ka rukom synshar paidbah bad kabym dei ban leh shiliang iano-iano hakhmat ka ain.
Ki nongialam jong ngi ruh, u Tirot Sing bad u Kiang Nongbah ki la aiti ialade da ka jingiap ban iada ia kane ka ri Khasi-Jaintia. Lada ki la kwah jingsuk, kwah kyrdan, kwah spah, da kaba suk ki la lah ban leh, tangba tip, yn dang don jait bynriew Khasi-Jaintia, yn dang don District Council, Hima bad Dorbar Shnong ne em katta.
Mynta pat ki nong ia burom ki iamih, ki iaburom, ki ia rakhe hi, hynrei khyndiat kiba bud ia ki nongrim ka hok, namar ka tyngka pap ka la synshar bad kiwei-kiwei de. Bun pat ki la shu long tang ki nongkyrshan bad nongpeitkai kat ia kaba kiwei ki leh. Sa ia lynniar ia u pud u sam, ba kyntur jubor u khar thor, lynniar ba bun tang ka sohsat suda, wat ka umdih hap shut thied, ka ding ilektrik ka la nang dum, ter-ter-ter sa kiei kiba dang suk?
To ngin ia ap, kaei kaban mih na Bengal, tip kan kthah ne em ia ki paid troh pisa? Ha Bengal lei ym dei shuh tang da ki spah, ki hajar ne ki lak ba ngop ha ki katto-katne ki nongialam. To ngin peit sa ki paidbah pat kin long kiba kumno ha Bengal.
Lada jop ka Mamata, dang don jingkyrmen ia ka Democracy shi rukom. Lada rem te la……………(ong hi la-la ka jingsngew)

Ka Jingrwai Jana-Gana-Mana ka Ri India
Da kaba burom ia u Rabindra Nath Tagore, uba la thaw ia kane ka jingrwai badon burom ka ri India, kaba don jingmut ruh, hynrei ban rwai tang ia ki shnong, ki lum, ki wah jong kiwei, imat kam biang shuh. Donkam ban rwai noh ia la ki jong de, kaba ngan pyrshang tyrwa ban pynrung ia kine khyndiat harum.

Jana Gana Mana
(Kumba ka long)

Jana gana mana adhinaayaka , jaya he
Bharata bhaagya vidhata.
Punjaba Sindhu Gujarata Maratha
Dravida Utkala Banga,
Vindhya Himachala Yamuna Ganga
Uchchhala jaladhi taranga.
Tava shubha name jaage,
Tava shubha aashisha maage,
Gaahe tava jaya gaatha,
Jana gana mangala- daayaka, jaya he
Bhaarata bhaagya vidhata.
Jaya he! Jaya he! Jaya he!
Jaya jaya jaya, jaya he!

Ai jingmut ban pynkylla ia ki para 3, 4, 5, 6, 7 bad 12, tang na ka bynta ka jylla Meghalaya kumne harum.

Jana gana mana adhinaayaka , jaya he
Bharata bhaagya vidhata.
Meghalaya-India, Garo-Khasi-Jaintia
Ranikor- Simsang, Umngot – Umiam
Balpakram, Sohpetbneng, Lum Shyllong, Tiniang-a
Khublei ia phi waroh, mathila
Ia ka nam jong ki kyntiew sha Me
Tava shubha aashisha maage,
Gaahe tava jaya gaatha,
Jana gana mangala- daayaka, jaya he
Bhaarata bhaagya vidhata.
Ia kyn-hie, ia kyn-hie, ia kyn-hie,
Jaya jaya jaya, jaya he!

Tip kumno kiwei kin ia ai jingmut?