Da ki hajar kiew pyneh rngiew ha Lum Sohpetbneng

Shillong, 1 Rymphang:
Da ki hajar ngut ki paidbah kiba dang don ha ka niam Tynrai ki la pynlong ia ka jingkiew pyneh rngiew ha u Lum Sohpetbneng mynta ka sngi.
Naduh ki khynah, ki samla ki tymmen ki kro ki la kiew pyneh ia une u Lum Sohpet Bneng uba la ngeit ba shisien mynno la don ka Jingkieng Ksiar ban pyniasoh ia ka Bneng bad ka Khyndew mynba ka hok ka dang synshar ia u Khyn Hynniewtrep.
Shwa ban pynlong ia ka jingkiew sha kliar u Lum, la don ka dem ka nguh da ki rangbah ka seng tynrai kiba la pyn long ia ka jingduwai phirat bad ruh halor u lum.
Ki paidbah naduh kylleng ki jaka jong ka ri Khasi bad Jaintia kynthup na West Khasi Hills, East Khasi Hills, Ri-Bhoi bad na Jaintia Hills district kiba dang ksoh ha ka niam tynrai ki la shim bynta ha kane ka jingkiew kaba ju long man u snem.
Naduh u Khynriam, U Pnar, U Bhoi, U War, Maram, Lyngngam bad u Diko kiba don ha kane ka jylla ki la pynlong kum u Hynniewtrep.
Ka jingpynlong ia ka jingkiew lum ka long ban pyneh rngiew ban beh noh ia ka khlam ka ngoh ka pang ka shitom bad ban duwai na u Blei ba un da un ker ia ka ri na ki jingma kiba la thmu ban pynjot thiaw ia kane ka ri.
Halor jong u Lum sohpet Bneng la pynlong ia ka jingknia ka jing khriam bad ka nguh ka dem da ki longshwa ryngkat ka um khuid um suba bad ka jingshad pyni kolshor kaba ju long man u snem.