Pynkut 100snem ka CAC Mission

Shillong, 1 Rymphang:
Ka Combined Ame teur Club, ka shnong Mission Shillong ka la pynkut noh ia ka jingrakhe dap 100 snem kane ka seng ha kane ka sngi Saitjain ha Durbar Hall ha Mission.
Ia kane ka sngi la pynshongkun da ka jingdon lang ka myntri sorkar kaba dei ka MLA na ka thain Ka Kong Roshan Warjri, u MDC Bah James Ban Basaiawmoit, u Rangbah shnong Bah GS Basan, bad ki riew rangbah ki seng ia kane ka klob.
Ha ka jingkren jongka, ka Kong Roshan Warjri ka la ong kum ki paidbah la dei ban don ia ka jingiatrei lang ryngkat ryngkat bad khamtam eh ban iamih ban iashim bynta ha kino kino ki kam la ka long jong ka shnong ne ki kam kiba iadei bad ki skhim pynroi jong ka sorkar ne kiwei kiwei khnang ban lah pat ban kyntiew ym tang ia ka shnong ka thaw hynrei kumjuh ruh ia ka imlang ka sahlang.
“Kane ka jingrakhe ia ka jingkynmaw dap shispah snem kam dei pat ban shu kut noh hynrei ba nangne shakhmat la donkam pat ban sain dur thymmai ban ialeh ban pynmih biang ia ki sap ki phong bad ia kiei kiei kiba don hakhmat’, la ong ka Myntri.
Ka Kong Roshan ka la ong ba ha ki por kiba la leit, la ju sakhi ba kiba bun ki iing ki ju kwah ia la ki jong ki khun ban leit pule doktor, enjiniar hynrei mynta la iohi ba ki kmie ki kpa ki la sngewthuh bad long shemphang ban jied katkum ka sap jong ki khun bad ban plie lad pat ba ki khun jong ki kin nang lah ban kiew ha ki kam ba ki don sap.
Ka Kong Roshan ka la pyllait paidbah ruh ia ka ‘thupsahkynmaw’ jong ka CAC.
Shwa ia kane, la ioh ruh ia ka jingkren na u MDC u Bah Basaiawmoit uba la pynpaw ba kane ka sngi kan nym dei ban long tang ka sngi ban khang pyrda ia ka jingrakhe hynrei ban bteng ban nang pynkhlaiñ bad kyntiew shuh shuh ia ka CAC khnang ba yn nanglah ban kyntiew ia ka burom kaba la jah shipor ka jong ka.
U Bah Ban ruh u la pynpaw ba ka jingiashim bynta jong ki paidbah ha kino kino ki kam ka long kaba donkam bha namar ka pynkhlaiñ bad kyntiew ia kano kano ka bynta bad ruh ba ka long ruh kum ka jingai mynsiem ia kiwei pat.
La pynlong ruh ia ka jingsam khusnam sha ki nongiashim bynta kiba la jop ha ka jingialehkai bapher bapher bad khamtam lei ka khusnam kaba kyrpang kaba la sam sha i heprit Isadora Lyngdoh iba la lah ban wanrah ia ka nam bad burom ym tang ia ka shnong hynrei ia ka jylla hi baroh kawei, da kaba i la lah ban jop bad khur takma ksiar ha ki rynsan ialehkai Karate ba la long ha Goa bad Mumbai.
La pynphuh pynphieng ruh ia kane ka sngi da ki jingrwai bad ruh ka jingpynher ia ki 100 tylli ki balloon bad ruh ka jingplie ia u maw pynsah jingkynmaw.