BALEI IA NGA

SKN

[ba bteng]Haba baroh ki ar ngut ki la dep khreh ki sa ia mih nangta ban leit sha Robert Hospital, ka ba don ha Jaiaw. Ki poi ha Hospital 9:30 baje bad ki sa ioh ban ieng kham ha khmat. Haba la rung sha ka Doctor, ka ba khmih hangta, marsien ktah ka Doctor ka shu ong.

Ka Doctor ka thoh dawai bad ki sa ia mih noh nangta. Marsien mih nangta ka Niakha ka shu ong
“Pleng pha la arsap ar phong bha mynta… Iathuh uei u Lok jong pha..” La kren dom ka Niakha
“Phi la shim dawai teng nangno nangno… Phi tip em ba phi la jan dap bnai artat..”
Ka Rida ka ong
“Ngam tip Doctor…” Ka la saw kyrang ka dur ka dar namar ba ka Niakha ruh ka don hangta
“U shong ong u Lok jong phi…”la bniah ka Doctor
Ka Rida ka la jnang ban jubab namar ba don lang ka Niakha. Haba ka Rida kam iathuh ka Doctor ka shu sngap noh. Ka phai pat sha ka Niakha ban kylli.
” phi dei khun ?”
“Nga dei khun Kha Doctor ” la jubab ka Niakha
“O ine I khun jong phi I la armet lah jan dap bnai tat..” La iathuh ka Doctor
“O phi ong Doctor, ka jingarsap kane ka khynnah pleng, ngam tip eiei.. Ka ud pang ta ka daw nga wan noh shane…” La iathuh ka Niakha
“Ani ka eh hi, ki khun mynta te Kong, kumne beit…” La bynrap ktien ka Doctor
Ka Rida ka la shu sngap bad kyndit ka tuid ummat jrup jrup na ki arliang ngab.
“Balei pat pha iam..?” La kylli ka Niakha
Ka Rida ka shu sngap beit jar jar. Ka Niakha ka ithuh ba ka don kaei re kaei ka ba eh ba ka Khun Kha jong ka kam nud ban iathuh. Kumta ka la phai noh sha ka Kmie jong ka bad kylli.

“Nia balei kane ka jia iaka Rida .. Phi tip ia u Lok jong ka..?”
Jar jar ka Kmie ka Rida ruh, ka la shu sngap man man. Hangne ka Niakha ka la suba sniew shuh shuh ia kaei ka ba paw katkum ka jingleh ka Kmie jong ka ruh.
Kumta ka Niakha ka la shu sngap lem noh bad ki la ia leit noh nangta bran sha iing. Ka Niakha ruh ka bud lem sha iing. Haba la poi ha iing, ka Niakha ka la khroh jai iaka Rida
“Rida kaei ka ba pynlong ba phin shu sngap kumne. Wat lehrain khun phi dei ban iathuh beit khnang ba ngan tip uei u kpa ine I khunlung ba phi pun. Ym lei lei tang ba phin iathuh..” La khroh ka Niakha
Ka Rida ka la iam bhuk hangta bad ka la dem ngun la ka khlieh ha la ki arliang khohsiew.
“Wat iam khun.. Nga la ong iaphi tang ban tip.. Long phin shu hun ba ngin ym tip ia u Kpa I khun jong phi. Ka long ka pop ka bakhraw” la bteng biang ka Niakha.
“Ngan sa iathuh Niakha ap shipor…” La phai ktien ka Rida
U Panah na kyndong uba la sngap tuh u la sheptieng ria.
“Hangta te la wai tad ianga..” U la kren wei briew.
“To sa iathuh ba ngan tip.. Phi tharai I Niakha in suk hi ka mynsiem … Nga ngeit I Pa jong phi lei na sha lyndet in sngewsih bha haba phi long kumne..” La ban ktien biang ka Niakha.
“To Niakha..” La ong pat ka Rida.

Ka Niakha ka la hun haba la ioh sngew iaka ktien na ka Rida ka ba la kular ban sa iathuh noh. Hadien kata ka sa dihsha bad bamkwai bad ka sa mih noh nangta ban leit sa iew. [yn dang bteng]