Shillong: U MLA jong ka Mawsynram u Bah Himalaya M Shangpliang, u la iathuh ba un sa rah hapoh ka iing dorbar thawain ka jylla halor ka jingeh ba ki nongtrei jong ka Mawmluh Cherra Cement Limited (MCCL) ki mad bad kumjuh ruh ia ka jingbym treikam jong ka MCCL kawei na ki karkhana pynmih dewbilat jong ka sorkar.
Ha ka jingiakren bad u Bah HM Shangpliang, u la ong, “Ngi ruh ngi sngewlem ia kine ki nongtrei jong ka MCCL. La don bunsnem mynta ba ki nongtrei jong katei ka karkhana ki la ia kynduh, ha kaba iadei bad ka tulop jong ki ka bym biang kumjuh ruh kim ju ioh ia kiwei pat ki jingsiew ba ki dei ban ioh bad bun jait ki bynta ba ki dei ban ioh kum ka hok ka jong ki. Shisien peit lah ban ong ba kim dei ki nongtrei jong ka sorkar la shim bad la khein ia ki ba ki dei tang ki nongtrei bylla sngi (casual)” u la ong.
Shuh shuh u bynrap ba haba phai pat de sha ka karkhana, kim lah ban pyntreikam kat haduh mynta. Ka la don ka jingpynthymmai ia ka jingtreikam jong katei ka karkhana ha kaba na ka liang jong ka sorkar ka la ai da ki phew klur tyngka ban pynthymmai, hynrei wat la katta la bei ruh, hynrei kam lah ban pynmih dewbilat haduh mynta.
“Nga ngeit ka don kaei re kaei sha lyndet ia kaba ngi kum ki nongmihkhmat ngi dei ban iatai ia kane hapoh ka iing dorbar thaw ain ka jylla kaban mynta ka wat bad ngi dei ban pan ia ka jubab na u myntri ba dei peit ia ki kam karkhana ha ka jylla ia ki jingtip kiba bniah jong ka jinglut jong kane ka karkhana, ia ka jingsiew ia ki nongtrei hapoh kane ka karkhana kumta ter ter bad ia ki sien jam ba ka sorkar kan shim ban pynwandur bad pyntreikam ia katei ka karkhana” ong u Bah Shangpliang. U ong ruh ba haba peit ka MCCL mynshwa ka dei kawei na ki karkhana pynmih dewbilat kaba pawnam haduh katta katta ba ka dewbilat kaba mih na katei ka karkhana ka long shisha ka dewbilat kaba iaid dor ha ka iew ym tang ha ka jylla jong ngi hynrei ha ka thain shatei lammihngi baroh kawei. Hynrei kyndit kyndit, ynda la wan sa ki karkhana pynmih dewbilat jong ki riewshimet kum sha jaintia hills, ka iew jong ka MCCL ka hiar la ka hiar kane ka dei ka jingkylli kaba heh.
“Ngi donkam ban kylli na ka sorkar ba ka jingbha jong ka dewbilat na ka MCCL ka shu hiar kyndit kyndit hynrei ka bha pynban ka dewbilat ba pynmih ki karkhana shimet kiba dang seng dang khyndiat por. Lehse don ki jingeh na ka liang jong ka sorkar bym lah ban pynbiang ia ka pisa, hynrei kum u nongmihkhmat jong ka jylla nga, nga sngew ba ngi te kum ka party ngin kyrshan ia ki nongtrei jong ka MCCL ba ka sorkar ka dei ban wanrah ia ka lad ka lynti (road map) kaba nangne shakhmat ba ki nongtrei jong ka MCCL kim dei ban duh ja ba kim dei ban duh ia ki tulop bad ba ki dei ban ioh beit ia ka jingsiew jong ki man u bnai katkum ki nongtrei jong ka sorkar bad nalor kata ka karkhana ruh ka dei ban iaid shaid shaid ban pynmih ia ki dewbilat khnang ba kan ioh ban kamai shuh shuh ban pynim ja ia ki nongtrei jong ka MCCL”, bynrap u Bah Shangpliang.
Kum ban shu pynkynmaw, ba hynnin ka sngi ki nongtrei jong ka MCCL hapoh ka lama jong ka MCCEU, ki la leit ban buh ia ka dorkhas ha khmat u chief minister ban dawa na ka sorkar ba ka dei ban shim noh ia ka rai kaba khatduh ha kaba iadei bad ka jingeh jong ki nongtrei bad kumjuh ruh halor ka jinglong jingman jong ka karkhana ha Mawmluh.
Ka don ka jingbamsap ba shyrkhei, la dei bn ai wai ne contract Sha ki company shimet khnang bakan iaid bt ki Kam ,hynrei ynleh kumno Pat nongsohra biej ki pyrshah,ymbanse ka sorkar kn hap pyniaid jubor.kumno yn siew tulop haba ym don production.