Jurip Iew thymmai ka KHADC ha Mawser

Shillong, 30 ‘lyngkot:
U EM ka KHADC u ba peit ia ka Iew ka hat u bah Donkupar Sumer, uba dei ruh u MDC ka Umsning mynta ka sngi u la hiar sha ka shnong Mawser ban jurip na ka bynta ban shna ia ka iew thymmai ka ban long shisien shi taiew ha katei ka shnong.
Ka jingleit jurip ban shna iew thymmai ha ka shnong Mawser ka dei hadien ba ka KHADC ka la ioh jaka lyngba ka jingai sngewbha u trai jaka u Bah Jo Mawlong ia shi bynta ka jaka ka jong u kaba don ha katei ka shnong. Ia katei ka jingthmu ban shna iew thymmai la mynjur da ki rangbah shnong katei ka thain ha ka jingialang kaba u MDC u la khot ia ki ha karma treikam jong u.
Ka jaka ba la thmu ban tei ia katei ka iew, ka dei ka jaka kaba kdup haduh kumba 30 tylli ki shnong ki thaw kiba don hapoh ka thain. Ki rangbah shnong jong ki 9 seng hadien ba ki la mynjur ban thaw iew thymmai ha katei ka shnong ki la thaw da ka komiti kaba la tip kum ka Mawser Market Committee bad katei ka komiti kan iaid shakhmat ban pynbiang ia baroh ki jingdonkam sha ka District Council haduh ban da ioh ka jingmynjur ban thaw ia ka iew thymmai, bad ka jingthmu ban thaw ia katei ka iew ka long bay n long trai hi da katei ka komiti ym da ka district Council.
U Bah Don Sumer u la iathuh ba hadien kane ka jingwan jurip un sa leit pat ban iakren bad pynsngew hakhmat u CEM ka KHADC na ka bynta ban kyrpad ruh ban pynmang lem ia ka pisa ban ioh ban sdang noh ia kane ka kam, khnang ba kan iaid shaid shaid bad ioh ban plie noh shwa ban wan ka aiom lyuir. “Ia mynta hi ban pyniaid ia kane ka kam baroh shakhmat kan shong ha ka jingstad jong katei ka committee ki rangbah shnong, namar la aiti ha ki ban pynbeit lut ia ki kam ki jam bad kumjuh ruh ban ia soi ia ka soskular bad u trai jaka uba la noh sngewbha ia ka jaka,” la ong u MDC.
Ha kane ka sngi la pynshai shuh shuh ha kaba iadei bad katei ka iew ia ki rangbah shnong da ki ophisar jong ka Council ba kynthup ia u Joint Secretary Bah RS Wanniang lem u engineer bad u surveyor uba la shim jingkhein ia ka jaka, ia kaba la buh ban ioh kumba 20 hajar sq/ft.