Nalor ba hap pyntheid Mobile Phone, Computer, hap pynthied sa ka Generator

Ka long kaei kaei kaba ktah shisha ia ki longing longsem jong ngi kiba sah hangne ha Meghalaya, namar ngi mad ia ka jingkordit khamtam ia kito ki longing kiba dang don ki khun ki kti kiba leit pule ha ki University kiba pher bapher. Ho,oid ha kine ki bnai ki snem kiba lah dep ki kmie ki kpa ki hap ban wad ki lad ki lynti ban pynioh Mobile lane Smart Phone ia ki khun khnang ba kin ioh ban bteng ia ka jingpule ka jong ki, namar ba lada ymdon Mobile ngim ym ioh lad shuh ban pule hangno hangno ruh, bad shibun na ki khynnah pule kiba duh noh ia ka jingpule lane kiba hap ban sangeh noh ia ka jingpule jong ki namar ba ki wan na ka longing longsem kaba duk kaba ki kmie ki kpa kim kot ka bor ban pyntheid Mobile ia ki khun da ki phew hajar.

Ho,oid mynta ha kine ki khyndiat bnai kiba lah dep, sngi sngew nguh ia u Blei bad ia ki bor pyniaid jong ka Ri jong ngi ha kaba ki la ailed ia ki katto katne ki khynnah ba kin wan sha skul ka lah iarap ia kito ki longing baduk ban bteng biang ia ka jingpule jong ki.

Hynrei kaba kham shitom pat ka long ia ngi kiba dang pule ha ki University kiba heh kiba bun briew, namar haduh mynta ngim pat ioh lad ban don ha ki jaka pule jong ngi, ngi hap hi ban leh da ka online Class lyngba ki Mobile lane Computer jong ngi, bad nalor kata haba ngi phai pat sha kane ka por kaba ngi im mynta ia ngi kiba dang pule kiba hap ban leh online class man la ka por, nalor ki Mobile bad Computer ka donkam sa ka Generator namar ban don tang ki Mobile bad computer khlem ka light kam long. kumta ngi donkam sa ka Generator.

Kumta nga kum uwei na u Khynnah ba dang don ha ka jingpule, nga kyrpad jur lyngba kane ka jingthoh barit jong nga, ba ka sorkar katba lah kan pyrkhat lem ia ngi ki khynnah pule kiba mad ia ka jingjynjar kaba suhsad, ho,oid ka jingshisha ka long ba lada ngi don ka Battery ha ki Mobile ki computer ngi sngew ba ka lah biang. Hynrei kaba eh pat khamtam shane ka Jaintia ka long shisien ba lah duh ia ka light ka Network ruh ka lah duh lang, te ka long kaba jynjar ia ngi ban bteng lane ban pyndep ia ka online class jong ngi.

Kumta sa shisien nga kyrpad jur ia ki bor ba halor ba dei peit, to nang thaw ki lad ki lynti ban lait na kane ka jingjynjar, ka jingjynjar kam dei tang ia ngi kiba pule online lane online class, ka dei ruh ia ki Dukan Studio, Computer bad ia kiba bun ki dukan kiba pyndonkam da ka Light namar ba lada kam don ka light ki hap ban shong kli kti man ka sngi.

Khublei shibun,

Rishotki S Dkhar