Phah lum kyrkieh ki khlieh nongsynshar ia ki dorbar shnong

Shillong, 30 ‘lyngkot:
Ka dorbar ki Khlieh Nongsynshar hapoh ka jingialam u bah John F kharshing mynta ka sngi ka la ia kynduh biang ban iatai halor kaei kaba la mih na ka jingkhot ia kren ka sorkar ha ka 20 tarik u kyllalyngkot. Ha katei ka jingiakynduh ka la shim ruh ia ka rai ban kyntu ia baroh ki Dorbar shnong, dorbar Raid, dorbar Hima ba ki dei ban lum ia ka dorbar kyrkieh ban ia thir bha halor ka shithi kaba wan na ka tnad MHA bad kumjuh ruh halor ka hukum ba ka high Court ka la pynmih dang shen bad ia ki rai jong ki ki dei ban phah sha ka ophis jong ka dorbar ki Khlieh nongsynshar. Halor katei ka hukum ka high Court ka jingialang ki khlieh nongsynshar ka la shim ruh ia ka rai ban thaw ia kawei ka komiti ka ban peit ba ki Khlieh nongsynshar kin thaw lad ban pynpaw ia ka jingpyrshah jong ki ia ka rai ka high Court sha ka Division Bench.
Ka la shim ruh ia ka rai ban phah biang ia ka dorkhast sha ka Sorkar Jylla Meghalaya ban phah noh kham kloi ia ka jubap halor ka jingpyntrei kam ia ka Instrument of Accession and Annexed Agreement 17, 1948, bad ka kaiphod halor ki Hima Khasi States, kumba la pan da ka tnad Ministry of Home Affairs, (MHA) Sorkar India lyngba ka shithi kaba la phah sha u Chief Secretary, Meghalaya ha ka 27 tarik u naiwieng 2014, ha shuwa ban pynbeit thymmai ia ka Sixth Scheduled. Ka Sorkar Meghalaya bad District Council ki dei ban bsuh ia ka Instrument of Accession(IOA & AA) hapoh ka Constitution Ri India, kumba ioh ki jaidbynriew Kashmir ha kaba paw ka IOA jong ki lyngba ka Article 370. Ka la shim ruh ia ka rai ban bteng ia ka jingdawa ban ioh ia ka Regional Council kaba kyrpang na ka bynta ki Khlieh Nongsynshar bad ban kyntu ia ka Sorkar Meghalaya ban pynbeit ia ki kyndon jong ka 6th Scheduled ha kaba yn batai shai ban don ka Regional Council na ka bynta ki Khlieh Nongsynshar. Ban kyntait ia ka jingtyrwa ban pynrung ia uwei u Khlieh Nongsynshar kum u MDC ba shu sieh, namar kum ban shu pynkynmaw ka Dorbar Ki Khlieh Nongsynshar ha u snem 2003 ka la kyntait ia ka kaiphod bad ka jingtyrwa na ka National Commission for Review of the Working of the Constitution (NCRWC) jong ka Sorkar NDA ban sieh san(5) ngut ki Khlieh Nongsynshar kum ki MDC.
Kawei pat ka rai ba ki la shim ka dei ban kyntu ia ki bor KHADC ban thaw lad ban pynbeit thymmai ia ka Village Administration Bill ha kaba ka dei ban weng noh ia ka jingbatai Village Development Council bad ha kaba dei ban shaniah ia ki Dorbar Shnong ba kin thaw ia la ki jong ki Committee, ym ban pynmih ar tylli ki bor hapoh kawei ka Shnong, bad ha kaba ka Village Administration Bill ka dei ban long la ka jong ka jong na ka bynta ki 54 tylli ki Hima/Elaka .