Jaw ummat u nonghikai Contractual, namar ka jingsngew diaw ba lah ban duh kam noh

Shillong: Hadien ka jingshong shah thngan kaba khlem pud sngi bad ka jingsah miet ha madan Malki, ka All Meghalaya Government Lower Primary Contractual Teachers Association ha ka 3 tarik u Lber 2021, ki la wanphai biang sha Madan Malki ban bteng biang ia ka jingshong shah thngan ka jong ki kaba khlem pud sngi, tad haduh ba ka Sorkar Jylla kan da khot iakren ia ki hadien ba kine ki kynhun nonghikai ki la sngewthuh ba kin sa shah weng noh na ka kam hikai skul hadien ba ka Sorkar Jylla ka la nang iaid shakhmat ban pynkhreh ia ka interview na ka bynta ki samla pule kiba la dep ia ka eksamin jong ka Meghalaya Teachers Eligibility Test hashwa ban ioh thung kam noh ia ki ha ki skul Sokar kiba don ha kylleng jong ka jylla.

Haba kren sha ki katto katne ngut ki lad pathai khubor, uwei na ki dkhot jong ka Government Lower Primary School Contractual Teachers Association u la jaw ummat hi brup haba u la pynpaw ia ka jingshem lanot ka jong u kaba um shem la poi pyrkhat ba ka Sorkar Jylla kan pynsangeh noh ia ki na ka kam hikai skul namar ba ki dei tang ki nonghikai ba la shu thung kam tang shipor. Kine ki nonghikai dang shen ki la pynlong ruh ia ka jingiaiaid rally na Madan Iewrynghep Laitumkhrah bad pynkut pat ha Madan Malki kum ka dak ban pynsngew sha ki shkor jong ka Sorkar Jylla ba kan sngewsynei lem ia ki ba kin thung kam biang iaki ha ki skul ba ki la hikai da ki phew snem.

Une u dkhot jong kine ki nonghikai u la kyrpad na ka Sorkar da kaba u la ong, “Sorkar badon burom, sngewbha shoh ia ngi na ki kti, shoh ia ngi na ki kjat tangba wat shoh ia ngi na ka kpoh, lada phi shoh ia ngi na ka kpoh, ka ktah ia ki khun jong ngi, ka ktah ia ka iing ka sem jong ngi. Thung biang iangi kumba phi la appoint ia ngi ban long ki nonghikai. Wat bret jyndat ia ngi, wat hikai ia ngi ba ngin long ki lehnoh. Phi khot ia ki lehnoh sha ka miej jingiakren ban long ka ri kaba suk kaba saiñ hynrei ia ngi ki nonghikai phi pynbor ia ngi ban long ki lehnoh. Wat leh kmienah iangi hynrei iarap iangi ba ngi ruh ngin long kita ki nongtei ia ka Ri”.