U SOHMYNKEN: KA JINGMYNTOI JONGKA JINGKOIT JINGKHIAH KIBA NGI IOH NA KABA BAM IA U SOHMYNKEN

Kong Linda Kongwang

U sohmynken la ju tip ba udei uwei naki jait jingbam u balah ban pynkylla iaka rukom bang haki jingbam kiba ngi ju bam. U shim iaka bynta kaba khraw ban wallam jingbang haki jingbam khamtam haka por bamja. Khambun ki jingtah kiba ju shet, ngi ju kynthuplang ki sohmynken haki, kane ka pynjur iaka jingbang haki jingbam bad ruh ka ai jingmyntoi shibun iaka jingkoit jingkhiah jongka met.

Ki sohmynken ki don bunjait bad bun rong, hynrei napdeng kine u sohmynken im(rong jyrngam) udei uba sat tam haba ia nujor bad kiwei ki pat. Ka daw halor kine ka long ba u sohmynken im u don ia kita ki jait compound kiba wallam iaka jingtyrha kaba jur.

Lait naka jingpynbang ki jingbam kiba ju bam, u sohmynken udei ruh uba don iaki kynja dawai compound kiba long ka daw halor ka jingsat jongu sohmynken. Kine ki compound kidei kiba lah ban iarap iakhun pyrshah halor ka jingpur ka jingpang bampong haka met. Nalor ka jingbang bad ka jingiwbih kaba ngi ioh na u sohmynken, ngi lah ruh ban ioh shibun ki jingmyntoi na u.

KI JINGMYNTOI NGI IOH HABA BAM IA U SOHMYNKEN.

1. U BA KYNSAI NAKA BYNTA KI JINGBAM BA TEI MET:— U sohmynken um don calories bad kane kadei kaba biangtam naka bynta kito kiba ju mlien ban pynleit jingmut ban bam iaki jingbam tei met. Kine ki sohmynken kilah ruh ban kyntiew iaka metabolism haka met da 50% haduh 3 kynta pura hadien ba ladep bam iaki bad kane ka iarap kyntiew iaka jingkoit jingkhiah jongka met.
2. BAN PYNHIAR KA JINGKHIA KA MET:— Ka jingbymdon ka calories ha u sohmynken ka iarap kloi ban pynum bad pynstet halor ka jingtreikam bha hapoh ka met. Ka bor tyrha ha u sohmynken kalah ban kjit iaki nutrients kiba kongsan kaba iarap ban pynhiar ka jingkhia ka met. Kynthup iaki sohmynken haki jingbam ba manla ka sngi jongphi naka bynta ban pynduna iaka jingkhia ka met bad ruh naka bynta ka jingkoit jingkhiah jongka met.
3. KA JINGTYLLIAT BHA KI JINGBAM:— Ka jingeh bad shitom ka kpoh kadei kaba ju wan jia manla kapor haka jingim ba manla ka sngi. Ha kum kine kipor philah ban kynthuplang is u sohmynken haki jingbam jongphi namar ki sohmynken kidon kyrhai ka fibre kaba lah ban pynduna iaka jingeh kpoh bad ha kajuh kapor u riewspah haka jingdon ka Vitamin C kaba lah ban sait pynkhuid iaki jakhlia naka met bad pynsuk ban bret iaki jakhlia naka met bad kane ka iarap halor ka jingtylliat bha ka jingbam hapoh ka met.
4. KA JINGKOIT JINGKHIAH JONG U KLONGSNAM:— Ka jingdon ka Beta-carotene ha u sohmynken im ka ai jingiarap shibun halor ka jinglah ban treikam bha u klongsnam kaba ialam shaka jinglong khlain ka bor met. Bad kumjuh ruh ka jingdon ki antioxidants haki sohmynken, kalah ban khanglad halor ka jingshahktah ki thied klongsnam bad kilah ruh ban tehlakam iaka jingkiew ka cholesterol haka met bad ka khanglad halor ka jinglang tylli ka snam hapoh ka met.
5. KA JINGTEHLAKAM HALOR KA JINGKIEW KA BLOOD PRESSURE:— Ka compound capsaicin kaba don ha u sohmynken im la jutip ba u lah ban pynbiang iaka temperature haka met kabalah ban iarap halor ka jingkiew ka blood pressure haka met. Ka jingkynthup lang is u sohmynken im haki jingbam ba manla kasngi ka wallam ka jingtuid beit ka snam haki thied snam bad kane ka lah ban pyllait naka jingkiew ka blood pressure.

6.KA JINGIADA NAKA JINGPANG BAMPONG:— Lait naka jingpynbang ki jingbam ba ngi ju bam, kine ki sohmynken im kidon ruh ki kynja dawai compound capsaicin kiba lah ban tehlakam halor ka metastasis kiba lah ban iakhun pyrshah iaka jingpang bampong haka met. Ka jingdon ki phlia bad ki antioxidants kilah ban iada naka jingngat ha kiba bunjait ki jingpang bampong kynthup naduh ki bampong haki tor, la shyntur, ki snier bad ki tangkro.

7. KA JINGTEHLAKAM KA JINGKIEW KA SHINI (DIABETES):—- Ka jingpang shini kadei kaba kynrei bha mynta ki por bad kane ka buh jingma iaka jingim khamtam is kito kiba laheh ka rta. Hynrei phim dei ban khuslai, u sohmynken ulah ban iarap iaphi shuwa ba kane ka jingshitom kan iohlad ban suhthied haka met. Ka jinglah ban tehlakam iaka jingdon ka insulin ha une u sohmynken kalah ban iarap hapdeng kito kiba don iaka jingpang shini. La ju tip ba u lah ban pynbiang iaka shini haka snam lyngba ka jingtehlakam ka jingdon ka insulin.
8. KA THYMMEI BAN DON KA VITAMIN C:— U sohmynken im u don kyrhai ka Vitamin C ha u, uba lah ban iarap iaka bor met bad ialeh pyrshah ia shibun ki jingpang kiba ktah iaka met.
   Khublei.