Shillong:Ka Meghalaya ha ka jinglehkai ba myn hynnin ka sngi jong ka Vijay Hazare Trophy ha Chennai ka la ioh ia ka jingjop pyrshah ia ka Manipur da 83 run bad da kane ka long ka jingjop kaba saw sien kynthih jong ka.
Da ka jingioh 16 point ka Meghalaya ka long kaba lai na ka group jong ka, hadien jong ka Uttarakhand bad ka Assam. Ki don phra tylli ki kynhun ha ka group hynrei mar kawei ka kynhun ka ioh ban lehkai tang mar san sien. Ka Meghalaya kam don kano kano ka jingia drawn bad ka Assam hynrei ka la shah rem pat ha ka Uttarakhand.
Mynta ka sngi ka Meghalaya ka la jop ia ka toss bad jied ban tied bol shuwa bad ka la lah ban kamai 303/8 na ka 50 over ha kaba Manipur pat ka la kynjoh tang 220 da ka jingliem lut batroh ki wicket ha ka 48.4 over.
Watla u don tang uwei u nongtied uba la kynjoh ia ka half century kata u Abhay Negi, ki don pat sa saw ngut kiba la kot sha ka 40 khlieh kiba la pynlah ia ka Meghalaya ban poi sha ka 300 khlieh.
U Negi u la ioh ban rung madan ha ka por kaba lyngkot na ka bynta ka Meghalaya ha kaba ka kynhun ka la duh ia ki nongtied ba tbit kata u Sanjay Yadav (46 da 44, 4 tylli ki 4 bad 2 tylli ki 6) bad u Ravi Teja (45 da 54, 4 tylli ki 4) kaba dang poi 206/6 ha ka 41.1 over. Hynrei da ka jingwan u Negi bad u Dippu Sangma ki la pynneh ia ka rukom kamai jong ka Meghalaya ha kaba ki la pynioh shuh shuh sa 97 run na ka 8.5 over ba sah. U Negi u la pynkut ia ka jinglehkai da ka 56 run ha kaba u la thlieh 4 tylli ki 4 bad 4 tylli ki 6 kaba tang na ka 30 bol. Katba u Dippu pat u la shah mait da 24 run na ka 19 bol.
Ha kaba sdang uba la mih nyngkong u Rohit Shah u la thlieh 6 tylli ki 4 ha ka inning kaba la ai kamai ia u da 44 katba u Lerry Sangma u la poi 43 bad u la thlieh 2 tylli ki 4 bad 4 tylli ki 6 kum uwei na ki nongtied ba tbit ha ka kyrdan kaba lai.
U Langyonlamba u la pynkiuh shi por ia ka Meghalaya da kaba u la lah ban kamai 83, hynrei kiwei pat ki nongtied jong ka Manipur kim shym lah ban pynneh ia kane ka jingsngew ha kaba u Yadav u la lah ban pynkhyllem 4/21, kaba long ka point kaba bha na ka bynta ka Meghalaya ha kane ka Trophy match. U Akash Choudhary u ioh 2/31 bad u Dippu 2/39 katba u Teja u ioh 1/16.
Phi don ban ong eiei?