Hiar ka Iew Die kot, ba leh kam khaii ki skul

Shillong, 28 ’lyngkot:
Ka Iew ki nongdie kot mynta ka la hiar bak-ly-bak haba ia nujor bad kip or mynshwa. Ka daw ka long ba baroh ki skul khamtam ha sor Shillong ki ia pynlong kam khaii (business) hi ha man ki skul.
Haba kren bad katto katne ki nongdie kot ha Iewduh, ki la iathuh ba ka Iew die kot ka la hiar naduh katto katne snem ha kaba bun na ki skul ki la iadie hi ia ki kot ki kopi ha la ki skul sha ki khynnah skul.
“Ha ka jingshisha ki skul kim dei ban leh ia ki kam khaii kum ki nongdie kot nongdie kopi”, la ong uwei na ki nongdie kot ha Iewduh.
Kat kum ka jingong une u nongdie kot u la iathuh ba kane ka rukom leh khaii ha ki jingdie kot ha ki skul ka kham duna ha ki nongkyndong.
“Lada ym don sa ki nongkyndong, ngi la shu shongkai ym don nong thied kot thied kopi shuh”, la ong shuh shuh u nongdie kot.
U la ong ba ki skul kim dei ban kamai spah kamai pisa na ki khynnah skul bad kidei ban ailad ba kin thied hi na ki dukan ha kaba ki lah ban mon hi katkum ka jingdonkam jong ki.
Da kaba ki skul ki leh kumne, wat la ki khynnah kim mon ruh ki khynnah ki la hap ban thied beit kumba ki la buh ka jingbthah ki bor pyn iaid skul bad ka jingioh kamai jong ki skul ka long ka bym kom shuh na man uwei u khynnah skul.
U la ong ba ha ka jingshisha ki kopi ki long kumjuh hynrei ki skul ki shu shim kabu da kaba buh da ka dor ba kham rem tang da kaba ki shu tah da ki stikar jong ki kyrteng skul.
“Ki kopi kim don jingiapher lada ki thied na iew ruh nalor ki ioh ban mon bad kin jied hi katkum ka jingitynnad jong ki”, la ong shuh shuh une u nongdie kot.
U la ong ba kane ka jingduna ha ka die ka thied kawei ka daw ruh ka long namar ba ka sorkar ha ki skul SSA ka la sam ei ia ki kot ki kopi sha ki khynnah skul.
“Ha kawei kawei ka skul SSA ka sorkar ka la sam kot ei sha man ki khynnah kumba saw tylli eiei kum ki sobjek Science, Social Science, Maths bad English bad ki khynnah ki hap ban thied tang ar tylli lai tylli eiei”, la iathuh u nongdie kot.
Ka jinghiar ka Iew die kot ka la hiar palat ia ka 50 percent naduh ba ki skul ki leh ia kane ka rukom pyniaid.
Ha kawei ka liang la ioh jingtip ba don napdeng ki kmie ki kpa ki bym hun ia kane ka jingleh ki skul namar la long kumba shu pynbor ia ki khynnah ban thied watla kim shym la donkam ruh.