Pynphai ka sorkar ia ka Village Administration Bill sha KHADC

Shillong, 28’lyngkot:
Ka sorkar jylla lyngba ka Under Secretary ka kong E.M Lyng doh ka la phah ia ka shithi sha u Secretary ka Khasi Hills Autonomous District Council (KHADC) halor ka phang ka Khasi Hills Autonomous District (Village Administration Bill), ha kaba ha katei ka shithi ba ka sorkar ka la phah ka la kdew ba don katto katne tylli ki bynta jong ka Village Administration Bill ba ka KHADC ka la phah ki bym biang bad ba ka KHADC kan dang hap ban pynbeit biang.
Halor katei ka shithi ba la ioh pdiang na ka sorkar jylla haba kren sha ki nongthohkhubor mynta ka sngi u EM ka Elaka u bah K.P Pangniang u la ong ba ka KHADC kan jubab da ka jingthoh sha ka tnad District Council Affairs kaba dei ka jingthoh kaba ka Council kan ai jingpynshai halor ki katto katne tylli ki mat kiba ka sorkar ka la kdew. “Ka Bill kaba ngi la draft ka la biang, ngin phah da kato hi kajuh ka Bill hynrei ngin phah ruh da ka jingthoh ban jubab bad ban pynshai ia kaei kaba ka sorkar ka kwah jingshai” ong u bah K.P Pangniang haba ia kren bad ki nongthohkhubor ha kamra treikam jong u.
Halor katei ka juh ka mat, u bah Pangniang u la iathuh ba mynta ka sngi u la ia kynduh ia ka Synjuk Ki Rangbah shnong kiba hap hapoh ka jaka Municipal, ha kaba ha katei ka jingialang hapdeng jong u bad ki Rangbah shnong u la ong ba ki rangbah shnong ki la mynjur ba kin leit lang ryngkat bad ki bor ka KHADC ban ia kynduh ia ka sorkar bad ban dawa na ka sorkar ba ka dei ban mynjur noh ia katei ka Bill, hadien ba ki la dep ban pynbeit.
Ha katei ka jingiakynduh bad ki nongialam ka Synjuk Ki Rangbah shnong ba la wanlang da u President , General Secretary, kaba baroh ki dkhot jong ki –ki la wan 9 ngut, u bah Pangniang u la ong ba ki la ia kren ruh halor ka rai ka high Court kaba la ktah ia ka bor treikam ki Rangbah shnong. “Ki la shaniah tylli ha ka Council bad ki la kular ban ai ka jingiatreilang kaba jan hapdeng ka District council bad ki Hima, ban trei na ka bynta kaba bha bad ban pynbeit ia ki bynta kiba i donkam” pynkut u bah Pangniang.
Katkum ka jingiathuh u EM ka Elaka u la ong ba ha katei ka jingialang kaba la long ha kamra treikam jong u la donlang u Chief Executive Member ka KHADC u bah Adelbert Nongrum, u Deputy CEM bah Teinwell Dkhar, u bah Morningstar Mawsor, EM, u Secretary ka KHADC bad 2 ngut ki Joint Secretary.