Da ki phew lak shah shet ki paid ka Raid Madan Kyrdem ha kawei ka nongtrei MRB

Nongpoh: Ki paidbah kiba don da ki spah ngut na ki shnong bapher bapher hapoh ka Raid Madan Kyrden ha Ri Bhoi, ki la bitar eh kata hadien ba ki la shah shet shukor ha kawei ka briew kaba trei kum ka Business Correspondence ha CSP Nongthymmai Raid Madan Kyrdem kaba hap hapoh ka Meghalaya Rural Bank, Bhoirymbong Branch.

Ha ka jingialang ban pyrshah halor ka jingshah lehbein ha katei ka Nongtrei, hynnin ka sngi Saitjain, kiba bun ngut ki Longkmie ki la pynlong ia ka jingialang ha shnong Nongthymmai Kyrdem bad kata ka long ban pynpaw ia ka jingpyrshah kaba jur halor ka jingshah lehbein ha katei ka briew, namar ka pisa kaba ki kynshew bad thep ha katei ka Bank ka la jah lut bad wat ka passbook ki khlem ioh satia.

Ha katei ka sngi, ki la don da ki spah ngut bad haba sngap na ka jingiathuh kitei ki briew, kiba bun ki dei ki Longkmie, ki la iathuh ba haba khein kyllum baroh ka pisa kaba la jah, ka la kot sha ki phew Lak, namar don kiba la poi ka jingthep pisa haduh T. 4 lak, don kiba da ki phew hajar bad da ki hajar tyngka, hynrei kiba bun na kitei ki briew kim ioh ban bat ha kti ia ki Passbook bad don ruh kiba la iathuh ba katei ka briew kaba trei ha katei ka Bank, ka la dep ban sei tuh khlem ka jingtip ki trai.

Ka long ruh kaba sngewlyngoh ban iohi ha katei ka sngi, namar la jan baroh na ki Receipt Slip kaba la bat da kitei ki longkmie kaba ki la ioh ha ka por ba kit hep pisa ha ka Bank, ha kaba la iohi ba kim don ia kata ka jingshah shon shap ha ka Seal jong ka MRB, hynrei, hynrei la shu iohi tang ia ka tarik bad ka pisa kaba ki thep hapoh katei ka Bank, kata lyngba katei ka briew, kaba ki la kynnoh ruh ba ka la leh buittuh pyrshah ia ki.
Haba iadei bad katei ka jingeh kaba la iakynduh da ki paidbah na ki shnong kiba hap hapoh ka Raid Madan Kyrdem, u Bah Amberlight Masharing Asst. Secretary ka Raid Madan Kyrdem, u la ong ba ka jingleh da katei ka nongtrei jong ka bank ka la pynbitar eh ia ki paidbah kiba la pyrshang ban kynshew pisa hapoh katei ka Bank.

Namarkata, kum uwei na kiba peit ia ka bha ka miat hapoh ka Raid, ngi dawa na katei ka Bank ba ka dei ban pynphai noh baroh ia ki passbook bad ka pisa kaba ki paidbah, ki la leit ban thep hapoh katei ka Bank, lym kumta kum ki nongialam ka Raid kim banse ban shim da kiwei pat ki lad ki lynti kiba kham tyngeh, u la bynrap.