Pynbna U Dr Mukul ban buh Saian kolej ha Mawphlang

Shillong, 28 ’lyngkot:
U Myntri Rangbah ka jylla u Mukul Sangma u la mynjur ban buh noh ia ka kolej na bynta ka Science bad Commerce hapoh Mawphlang. Ia kane ka jaka na bynta ban buh kolej la ai da ki paid bah ka Hima Mawphlang.
U Myntri Rangbah h ka jingialang mynta ka sngi ha Mawphlang u la ong ba un pyllait ka skhim T. 22.49 klur na bynta ban shna surok ban pyniasoh ia ka Mawphlang bad Mawngap na bynta ban pynkhreh ia ka tamasa Terra Madre International Slow Food Festival ban long mynta u snem hangne ha shnong.
“Ka long kaba sngew kmen lada ngi lah ban pynbiang ia ka jingdon kam jong ki paidbah”, laong u Mukul bad u la bynrap ba kki paidbah ki dei ban iasnoh kti lang ban treilang bad ka sorkar na bynta ban trei ia ka kam ba bha.
U la ong ba ka Sohra bad ka Mawlynnong kidei ki shnong kiba la paw la paw ha ka pyrthei bad ka sorkar kan sa pyntikna ruh ba ka shnong Mawphlang ruh kan sa long kum kine ki ar tylli ki shnong ki ba paw.
“ Ka Mawphlang kadei ka jaka kaba itynnad bad ka lah ban long kum kawei na ki jaka jngoh kai pyrthei”, la ong shuh shuh u Myntri Rangbah.
U la kyntu ia ki paiabah kane ka thain ba kin long kiba la pynkhreh na bynta kane ka tamasa ka Terra Madre Festival ban long ha kane ka shnong.
Ha kane ka jingialang la donlang da u Myntri ka PWD(R) u bah Sniawbhalang Dhar, u Myntri ka GAD u bah HDR Lyngdoh, u Dr. Celestine Lyngdoh, u bah RV Lyngdoh bad kiwei kiwei de.