Smam dap ki jain iong, shaw kynhoi u paidbah, kaweh ka lama HYC

Shillong, 27’lyngkot:
Shuwa ba u CEM ka KHADC un poi sha High Court na ka bynta ban leit shah hajir, la iohi ba sha lynti ban rung sha high Court la dap mam da ki pulit teh jain iong ban pahara pyllun ia katei ka ing bishar. Ym tang katta, la iohi ba ha kylleng ki rud surok naduh mot phran, khyndailad shaduh sha High Court la dap smam da ki pulit pahara.
Hadien ba u CEM ka KHADC u bah Adel bert u la poi sha High Court la iohi ba nadien jong u kham pajih na high Court la wan ban synran da ki paidbah, hynrei kiba la shah kerkut noh ha ki pulit pahara ba kin tur sha high Court.
Tang mar ia mih u CEM napoh High Court la iohsngew ba ki paidbah ba wan synran ia u ki la ia pyrta jam, da kaba ia pyrta ‘Im slem Adelbert’, ‘Adelbert shipai ka ri’-‘Im slem HYC’- ‘Tur shaphrang ka ri’ bad katei ka jingiapyrta ka la long naduh ba mih na high Court ter ter haduh ban da poi ha District Council. La iohi ba kham pajih na high Court ki samla ki la ieng lymbung mar pyrshah ka ophis u Deputy Commissioner bad ka pynieng ia ka lama jong ka seng Hynniewtrep Youth Council. Ha katei ka jingiaid lynti naduh Kashari shaduh District council la pahara da ki pulit kynthup ia ki teh jain iong haduh ba ki paidbah ryngkat u CEM kin da poi ha District council.
Lah ban kdew ba san sngi shuwa ba ka sngi shah khot hajir u bah Adelbert nongrum kan poi, ki bor pyniaid district ki la pynjari da ka section 144CrPC kaba ym shah ia ki paidbah ban ia lum palat san ngut 500 mitar ka jingjngai pyllun ia ka high Court.