Plie u Mukul ia ka jaka hikai shna kali ha ITI Rynjah

Shillong, 27 ’lyngkot:
U Myntri Rangbah ka jylla u Mukul Sangma hynne ka sngi u la plie ia ka jaka hikai shna kali ha Industrial Training Institute (ITI) ha Rynjah kaba iasoi bad ka tnad Labour ka sorkar jylla bad ka Tata Motors Private Limited.
Ia kane ka prokram la pynlong da ka Directorate of Employment and Craftsmen Training, ka tnad Labour.
Haba plie ia kane ka jaka, u Mukul Sangma u la ai khublei ia ka tnad kaba la kyntiew ia katei ka jaka hikai kaba la sdang naduh u snem 2012. U la ong ba ka jingplie ia kane ka jaka shna kali ka long ban pynkup bor ia ki samla bad ban ai jinghikai ia ki khynnah kiba don sap ha kine ki kam ban kyntiew ia ka jylla.
U myntri rangbah ka jylla u la ong ba ka thong jong ka sorkar ka long ban ai jinghikai ia ki samla kiba don ia ki sap khang ban khring ia ki briew nabar.
U la ong ba ka sorkar kan pyniar shuh shuh ia kane ka kam khamtam sha ki thain nongkyndong.
Katba u S Ramadorai u Chairman ka National Skill Development Agency (NSDA) u la ong ba kane ka jaka ai jinghikai ka long na bynta ki samla ka jylla.
Ha kawei ka liang ka myntri ka tnad Labour kong M Ampareen Lyngdoh ka la ong ba ka jingdon jong kane ka jaka ai jinghikai kan plie lad ia ki samla kane ka jylla. Ka la ai jingmut ia kane kane ka tnad ba kan ai ka jingiarap khamtam ia kito ki khynnah kiba la iehnoh shiteng ia ka jingpule.
Ia ka Memorandum of Understanding (MoU) lasoi hynne ka sngi hapdeng ka sorkar jylla ba la mihkhmat da u B Hajong u Director, Employment and Craftsmen Training bad u Mr. S P Joshi u Consultant ka Tata Motors Private Limited.
Kiwei kiba kren ha kane ka sngi ki long u Ranjit Borthakur, Chairman ka North East Advisory Council, u SP Joshi, Consultant, Tata Motors. U bah Jemino Mawthoh MLA, u bah T Dkhar, Commissioner & Secretary, Labour.