Bynniaw ki nonghikai Primary, bym ia kynduh ia u myntri

Shillong:Ka All Meghalaya Adhoc Lower Primary School Association (AMALPSA), myn hynnin ka sngi ka la wan ban pynpaw ia ka jingeh ba kum ki nonghikai ki iakyn duh, na ka daw ba ki khlem lah ban ia kynduh ia u myntri ka tnad pule puthi u bah Lakmen Rymbui, wat la ki la pyrshang ban ia kynduh na ka por sha ka por.

Ha ka jing iakren bad ki lad pathai khubor, na ka liang u Bah R.S Khardewsaw u iathuh ba ka dorkhas jing dawa kaba ki ladep ban phah sha ka tnad pule puthi ka long halor ka tulop na ki ioh ha ka ba uwei u nonghikai ki ioh T. 12 hajar bad kane ka jingai ba T. 12 hajar ia u wei u nonghikai kam pat biang.

Kawei pat ka mat ka long ba ka sorkar ba la dep ka la kular ba kin kyntiew ia ki skul adhoc sha ka deficit, bad mynta kine ki nonghikai Adhoc ki dawa na ka sorkar MDA ba lada ka shem jingeh ban kyntiew na ka adhoc sha ka deficit ka sorkar ka dei ban kyntiew noh ia ka jingsiew na ka T. 12 hajar sha ka T. 30 hajar.

Ka mat kaba lai ka long ba ha ki skul lower primary ki don naduh ka klass nursery haduh klas V, katba ki nonghikai ki don tang arngut bad kane ka shim jingeh ia ki nonghikai ban hikai namar ba ki hap bam shim bun tylli ki klas ban ai ka jingshakri.

Ha u snem 2018 na ka liang jong ka seng ka la pynkhreh ia ka dorkhas ban ai ha u myntri ka tnad pule puthi, hynrei kim la ioh lad ban ia kynduh bad u wat la ki la pyrshang bunsien ban wad ne ia kynduh bad u, ha kaba ki la shu hap ban aiti noh ia ka dorkhas lyngba u PS jong u. U la ong ruh ba ka jingkyntait ka jong u myntri ka tnad pule puthi jong ka sorkar ban ia kynduh ia ki, kumta kim banse mynta ka sngi ka 23 tarik u Rymphang 2021 ba ki la leit ban ai biang ia ka dorkhas ban pynkynmaw ha ka sien kaba ar ia ki mat jingdonkam jong ki ia kaba ki ai lyngba u PS jong u myntri ka tnad pule.

Na ka liang jong ka seng baroh kawei ka buh ka jingkyrpad na ka sorkar ba katkum kata kaba ki ong ka equal work for equal pay, ba kan pyntreikam ia kane ka bynta khnang ba kan pynhun ne kan iarap ia ki nonghikai, namar ba kat haduh mynta ki nonghikai adhoc Lower Primary School ki dei kiba ioh ka jingsiew kaba duna tam na ki nongtrei kiba hap hapoh ka jingpeit jong ka sorkar.