Nai ujor haba siew ha tollgate, namar ban shna surok ka lut T.700 klur, ong U bah Prestone

Shillong: U symbud myntri rangbah la jylla u bah Prestone Tynsong, u la ong ba lada ki kali kin hap ban siew ia ka pisa ha ki tollgate ynnai ujor namar ba ban shna pynbha ia ka surok ka jinglut ka poi T600 klur haduh T.700 klur.

Haba iakren bad ki lad pathai khubor u bah Prestone, u la ong ba ka dor ban siew ha ki Tollgate ka don da ka categories rate ha kaba lada kin hap siew T.160 lane haduh T.180 kim dei ban ujor, namar ban pynbha ia ka surok donkam haduh T.700 klur bad kane ka dei ka dor ba la pynbeit da ka sorkar pdeng ha baroh kawei ka Ri. U la ong ruh ba balei ki sngew mong ban siew, haba kane ka pisa ka ba ki siew ka dei ba ki shim na ki nongshong kali bad lyngba ka jingsiew jong ki, ba ka jylla ka ioh ia ki surok ba bha kumta ki nongniah kali kim dei ban ujor ia kane, hynrei ki dei ban siew thikna. U bah Prestone u la ong ruh ba ka jingpyniaid ia u fasttag ha ki tollgate ka dei ka jingpeit bad jingpyniaid jong ka NHAI bad ka sorkar jylla kam lah ban leh eiei, halor kane namar ba kam hap ha ka jingpeit jong ka. “Haba iadei bad ka National High way kadei ha ka jingpeit jong ka NHAI ha kaba ka hap ban peit ha tollgate, ka jingshna ia ka surok lane ka jingpynbha ia ki surok Highway” u la ong.

Halor ka jingshem jingeh jong ki paidbah ha kine ki khyndiat sngi halor ka jingpyntrei kam ia u Fasttag u bah Tynsong, u la ong ba u Fasttag u dei u ba dang shu pyntrei kam da ha kine ki khynniat sngi ha kaba ka jingeh kan don beit, hynrei na ka liang ka sorkar jylla ka la dep ban bthah ia u Project Director ka NHAI ba ym dei ban pynjynjar ia ki paidbah. U la ong ruh ba ka jingeh ka ba ki briew ki mad ka long namar ba don na ki kali ki ba khlem pat register ialade kat kum ka hukum jong ka Ministry of Road and Transport jong ka sorkar pdeng. U symbud MR, u kubur ruh ba ha kito ki sngi ka la don ka jingeh ha tollgate hynrei kane ka dei na ka daw ka jingbymtrei kam bha ka machine bad la ong ruh ba ki paidbah ki ba rung ba mih na tollgate ki dei ban pan ruh ia ki receipt na tollgate ha ba ki ladep ban siew ia ka pisa.