Iaroh u MLA ba trei shitom ki nongtrei ha Marngar PHC, ha ka ban pynbiang ia ki nongshah sumar

Nongpoh: Hynnin ka sngi kaba u Bah Mayrald Born Syiem, MLA Nongpoh, u la leit ban jurip ia ka Marngar PHC, ka jaka sumar kaba ai jingsumar ia ki paidbah jong 52 tylli ki shnong kiba don ha katei ka thain, u la ai ka jingiaroh ia ki nongtrei hapoh katei ka PHC, kata hadien ba u la lap, ba ka rukom ai jingshakri da ki nongtrei hapoh katei ka PHC ka iapher bak-ly-bak haba ianujor bad kiwei ki PHC kiba don hapoh ka jylla.

Ka nongrim kaba la pynlong ia utei u MLA ka Nongpoh, ban ai jingiaroh ia ki nongtrei hapoh katei ka PHC, ka dei hadien ba u la ioh jingtip ba hapoh katei ka PHC, ka la ai ka jingshakri kaba bha tam ia ki nongwan shah sumar ha katei ka PHC bad nalorkata ba la ioh jingtip ba hapoh katei ka PHC, ka duna bha ha ka jingdon ki Longkmie kiba khlad ha ka por ba Kha Khunlung bad kumjuh ruh halor ka jingduna ki Khunlung kiba khlad hapoh katei ka Marngar PHC.

Utei u MLA ka Nongpoh, u la ai ruh ka jingiaroh halor ka jinglah ki nongtrei hapoh katei ka PHC ban pyntreikam hok ia ki skim kiba iadei bad ka koit ka khiah, kaba la pynmang kyrpang da ka sorkar pdeng bad sorkar jylla, na ka bynta ban nang pynbiang shuh shuh ha ka rukom treikam ka koit ka khiah ha Meghalaya.

Haba iadei bad katei ka jingleit jurip, u MLA u la lap ba katei ka PHC ka biang palat ha ka rukom treikam, kata ka long naduh ha ka khuid ka suba, ka rukom ai jingsumar ia ki nongleit shim dawai, ia ki Longkmie ba armet lem bad kiwei ki jingdonkam.

Haba utei u MLA u la leit ban jurip ia katei ka PHC, u la ong ba u la lap ba ka don ka jingiapher eh, haba ianujor bad kiwei ki PHC kiba don ha kiwei ki Distrik ha ka jylla bad uba la ong ruh ba katei ka PHC, ka la ai ka jingshakri kaba biang bad kaba la tam shakhmat ha ka rukom treikam ban ianujor bad kiwei ki PHC kiba don ha ka jylla.

Lyngba katei ka sngi, u MLA Nongpoh, u la pynnoh jingiarap da ki Kor jingpynsawa lem bad kiwei sha katei ka jaka sumar, khnang ba ki nongtrei hapoh katei ka PHC kin ioh ban pyndonkam.

Watla utei u MLA, u la lap ba ki dang don katto katne ki jingdkoh hangne hangtai halor katei ka jaka ai jingsumar paidbah bad halor ki jingduna kiba u la lap ha katei ka PHC, u la ong ba un sa iakren bad ki bor sorkar kiba deipeit ia ka koit ka khiah, khnang ba yn dang lah shuh shuh ban pynbha ia katei ka PHC.