Nang jur ka jingiakhih ka Congress, ba kiew dor ka petrol ha Assam

Guwahati:Ka seng Congress ha Assam, ka la nang pynjur ia ka jing iakhih jongka, ban pyrshah halor ka jingkiew dor tasam ka petrol bad diesel ha katei ka jylla, lem bad kiwei de ki marbam ba kongsan.

Ki nongialam bapher jong ka seng Congress, myn hynnin ka sngi, ki la iai bteng ia ka jing iakhih bad ia lum paidbah jongki, ha kaba ha Guwahati, la ialam da U Gaurav Gogoi, MP ka Lok Sabbha. Ha katei ka jing iaid paidbah, la synran lang da U Ripun Bora, uba dei u heh duh ka seng Congress ha ka Jylla.
U Gogoi, ha ka jingkren jongu, mynta ka sngi, ula ong “Ka jinglute jong ka BJP, lyngba ka khajna petrol, ka dei kaba u paidlang ka jylla, ula ia tip lut bad ka dei na kata ka daw, ba ki jing iakhih paidbah, ki nang bun briew, ha ka sngi kaba ar. Ki paidbah, ki la jlep hi soit ia kane ka jing synshar thombor jong ka seng BJP bad ki kwah ban weng noh na kane ka jing synshar thombor” ong U Gogoi.

U Ripun Bora, ha ka jingkren jongu, ula ong “Ka Assam, ka la jlep hi shoin, halor kane ka jing lute jong ka sorkar BJP, na ka khajna petrol bad mynta ki sngi, jong ki kam lehbor ka BJP, ki la kut, da ka jingmih jong u paidlang ka jylla, ban ia tylli lang ha ka seng Congress”.
U Debabrata Saikia, nongialam ka seng Congress ha iing dorbar jylla, u iaid paidbah ha Nazira jong ka Sivasagar district, ha kaba ki nong kyrshan jong ka seng Congress, ki ia mih paidbah ban pynpaw ia ka jing pyrshah jur, halor ka jingkiew dor ka petrol.

Ha kawei pat ka khubor, U Rahul Gandhi, ula ther tyngeh pyrshah ia U Narendra Modi, myntri rangbahduh ka Ri, halor ka jingkiew dor tasam ka petrol bad diesel ha ka Ri, ha kine ki sngi.
U Rahul Gandhi, u ong ba ka sorkar U Narendra Modi, ka la lute lut ia ka pisa na u paidbah, ban pyndap ia ki katto katne ngut ki paralok jongu, khlem jingtrei shitom eiei ruh em.

U Rahul, ula ong shuh shuh, ba u paidlang ka Ri, u dei ban tip, ba ka dor jong ka petrol, ka nang tad shi katdei ha kine ki sngi, hynrei la lute ia ka pisa u paidbah, da ka dor kaba nang kiew tasam man ka sngi.
U Rahul, ula ong “Haba phi peit ia ka jingher stet jong u meter, ha ka por ba phi theh petrol, kynmaw ba ka sorkar U Modi, ka nang khlong ia ka pisa kaba don ha ki pla jongphi bad ka pyndap ia ki pla jong ki paralok jongka” ong U Rahul Gandhi.