Ka sngi shah khot hajir kam dei ka sngi khih bitar:CEM rNgan pan map, lada nga pynmong, ong U bah Adel ha ka 27tarik

Shillong, 23’lyngkot:
U Chief Executive Member ka Khasi Hills Autonomous District Council u bah Adelbert Nongrum, u la kyntu ia ki paidbah ba kim dei ban long kiba khih bitar ha ka sngi ba un leit hajir sha High Court hynrei ki dei ban shim ba kan long kum ka sngi ban pynskhem ialade ba ngi don ka jingshaniah ba ka hok kan kyntiew ia ka jaitbynriew. Katei ka jingkyntu jong u ka dei hadien ba u la ioh jingtip ba kin don bunbah ki paidbah na ka ri Khasi –Jaintia ki ba la bitar shla halor katei ka jingshah khot hajir jong u ha ka high Court haduh ba ki bor pyniaid Distrik ki la pynjari syndon da ka Section 144CrPC.
Katkum ka kyrwoh khubor ba u la pyllait paidbah mynta ka sngi u bah Adelbert u la ong, “Ko ki paidbah nga buh kane ka jingkyrpad hakhmat jongphi ba phin ia sngewbha ban pynsah ia ka nam kaba kane ka Jylla ka ioh kum ka Ri ‘Tip Briew Tip Blei’ bad nga kwah ba ha katei ka sngi kan nym don kano kano ka jingmih kulmar ne ki kam kiba lah ban pynsngewsih iano re iano hynrei ban burom ia ki ain kiba don hapoh ka synshar ka khadar’. Shuh shuh ha ka kyrwoh u la ong ba kum ba ngi dei ki jaitbynriew ti briew tip blei, ai ba ka 27 tarik u kyllalyngkot ne ka sngi shah khot hajir jong u ba ka sng kan sep khlem kano kano ka jingkhih bitar na ka liang ki paidbah hynrei ban ailad pat ba ka hok kan ioh ia ka jingjop ym ka pop ka ban pynlehrain ia ka jaitbynriew.
“Ha katei ka sngi khlem pep ngan kren ia ki jingshisha hynrei ngan long uba kloi ruh ban pan map lada ki don ki kyntien kiba nga kren kham mynshuwa ki la long kum ka jingpynibor, pynlehrain ne la pynmong iano re iano khamtam ia ka Judiciary” ong u CEM ha ka kyrwoh khubor da kaba bynrap da kaba ong biang “Nga don ka jingsngew ha lade shimet ba ka jingshah khot hajir ka jong nga kam dei kaba nga dei ban sngew phylla hynrei ka long kum ka lynti kaba U Blei u don ka jingthmu kaba bha haba iadei bad ka hukum kaba la pynmih da ka Meghalaya High Court halor ka iktiar jong ki Rangbah Shnong”.
Haba pynkut ia ka kyrwoh u CEM ka KHADC u la ong “Ngam don eiei shuh ban ong hynrei tang ki jingkyrpad kiba rit ki jong nga khlem da buh jingkhein ba ngi dei na ka kynhun niam aiu ba ngin buh ha ki jingduwai bad ban kyrpad ia U Blei ba un wanrah ia ka jingtylli hapdeng ki paidbah jong kane ka Jylla bad ban trei na ka bynta ka hok bad ka jingshisha”.