Pyneh ki trai jaka ban ker sainar, na mar pud bad ka Bangla

Shillong, 23 ’lyngkot:
Ki trai jaka kiba hap ha khappud ka India bad ka Bangladesh ki la pyneh beit triang ba ka sorkar ka dei ban ker sainar shiah naduh u Zero Line bad namar kane ka daw, ka jingker sainar shiah ha ki 100 meter jong ka khappud ka India bad ka Bangladesh ka dang sahkut khlem pat lah ban iaid shakhmat.
U heh ki BSF ka Meghalaya Frontier u IG Sudesh Kumar u la iathuh ba ka jingker sainar shiah ha ki 103 kilometer jong ka khappud ka India bad ka Bangla ka dang sahkut.
Haba kren hynne sha ki nongthoh khubor, u Sudesh Kumar u la iathuh ba na ki 443 kilometer jong ki khap pud ka India bad ka Bangla ha Meghalaya, tang 350 kilometer la dep ban ker sainar shiah katba sa kumba 80 kilometer ym pat lah ban leh bad kine ki dei ha bynta jong ka Khasi bad ha Jaintia Hills namar ka jingbym ai jaka ki trai jaka kiba dawa ba ia ka jingker sainar dei ban leh naduh ka Zero Line.
Katkum ka jingong u Sudesh Kumar, ka jaka kaba heh kumba 18-19 kilometer ka dei kaba hap ha ka jaka ka tnad Forest bad kyrmen ba ka tnad Environment and Forest kan ai ia ka jingker sainar. Lah ban kdew ba u Chief Secretary u la khot ia ka jingialang dang shen bad ki District magistrate kiba hap ha khappud ha kaba la bthah ba kin pynsted ban shim jaka na ka bynta ban pyndep noh ia ka jingker sainar.
Ka sorkar pdeng ka la pynpaw ia ka jingsngew khia ia ka jingbym ai jaka ki briew na ka bynta ban pyndep ia kane ka jingker sainar, kaban tem ia ka jingwan rung beain ki briew bad kiwei ki jingshalan tuh ia ki tiar. Ki trai jaka bad ki sengbhalang ki la pyrshah jur ia ka jingthmu ka sorkar ban ker sainar bad ki la dawa ba dei ban ker naduh u Zero Line khnang ba ki jaka ki puta jongki kin nym phet lut sha Bangladesh.