Maham u heh ka FKJGP Ri Bhoi, ia ka MeECL, ba thmu ot bor ding

Nongpoh:Ki kam leh thurmur ka Megha laya Electricity Co-orporation Limited (MeECL) ban ot bording kulmar ia kito ki longiing kiba sahram kaba T. 2 hajar tam ka bai bording ha ka tnat MeECL, ka la pynbitar eh ia ki nongialam ka FKJGP ha Ri Bhoi.

Ka nongrim kaba la pynbitar eh ia ki nongialam ka FKJGP ha Ri Bhoi ban bitar halor katei ka jingthmu ka tnat MeECL ban ot bording ia kito ki longing kiba la sahram palat T. 2 hajar tam, ka dei hadien ba ki la ioh shibun ki jingujor na ki paidbah na bun tylli ki shnong, kiba la ujor sha ka seng, da kaba kynnoh ba katei ka jingthmu ot bording ka MeECL, ka la bakla shaba palat, namar ki don bun ki iing kiba ki nongtrei ka MeECL ki la thmu ban ot bording, hynrei ki dei pat ki longing kiba ju siew thikna ia ka bai bording sha ka MeECL.

Haba kren sha ki lad pathaikhubor, u Samla Shanlang Diengdoh, General Secretary ka FKJGP ha Ri Bhoi, u la pynrem jur halor kitei ki kam thurmur da ka tnat MeECL, ha kaba u la ong ruh ba katei ka sienjam da ka MeECL, kan sa ktah jur ia ki paidbah nongpyndonkam bording bad khamtam eh ia kito kiba sahram tang khyndiat khynsoit.
Utei u heh nongialam ka FKJGP, u la ong ruh ba ka seng ka la ioh shibun ki jingujor na ki paidbah, kiba la pynpaw sha ka seng ba ki la dep ban siew dep ia ka bai bording, hynrei watla katta ki dang shah byrngem ha ki briew ka MeECL ba kin ot-bording ha ki iing jong ki.

Haba kynthah halor ki kam thurmur ka tnat MeECL, utei u heh ka FKJGP, u la ong ba ki don ki longiing kiba pyndonkam bording bad ka bai bording ka shait poi T. 6 spah ha ka shi bnai, pynban tang namar ki kam thurmur da ki nongtrei ka MeECL, kiba kum kitei ki longiing ki ioh pat ia ka jingthoh na ka MeECL, ba ka jingpyndonkam bording jong ki, ka la palat ia ka phew hajar ha ka shibnai.

“Ki nongtrei ka MeECL ba ki dei ban rung thliew iing hashwa ba ki buh ia ka dor ha ka jingpyndonkam bording, namar lada shu khien kulmar na ka jaka kaba ki trei lane na iing, ka long kaba bakla palat bad kaba pynjynjar ia ki paid nongpyndonkam bording” bynrap u Bah Shanlang Diengdon.
Halor kine ki kam thurmur da ka tnat MeECL, ka seng ka kyntu ia ki nongtrei ka MeECL ba kim dei ban leh thurmur shaba palat, ha kaba u la bynrap ruh da kaba ong ba ka seng kan sa leit ban wad jingtip na ki heh kiba deipeit bad lada lap ba don ki kam thurmur ne ki jingthmu ban pynkamai iano re iano, na ka liang ka seng kan nym mab satia.