Ha ka sngi leit shah bishar U CEM KHADC rHukum U DC, bym bit ialum briew haduh 500metre

Shillong, 22’lyngkot:
Dang khyndiat sngi, ki Seng bhalang bapher bapher kumjuh ruh ki seng sain pyrthei bapher bapher ki la kyntu ia ki Rangbah Shnong bad ki khlieh nongsynshar ba kin ia mih ryntih ban leit synran ia u bah Adelbert Nongrum, Chief Executive Member ka KHADC sha ka jingshah khot hajir jong u ha ka High Court ha ka 27 tarik U kylla lyngkot.
Hynrei san sngi shuwa ba u bah Adelbert un leit hajir sha High Court, u district Magistrate u la ioh jingtip ba kin don bun bun ngut ki briew ki ban wan synran ia u CEM sha high Court, kynthup ki kynthei ki longkmie, bad u la ong ba ki bor pyniaid district ki long husiar noh ioh ba katei ka jingialum lymbung u paidbah kan pynmih pynban kano kano ka jingkulmar kaba pynthut ia ka shongsuk shongsain kaba lah ban poi sha ka jingmynsaw lane ka jingma ha ka jingim briew.
Kumta u DM u la pynjari da ka section 144CrPC kaba khang pyrshah ba ym bit ban ialum lymbung palat ia ka san ngut ha ka jingjngai kaba 500 mitar pyllun ia ka High Court, lane ban rah ia kino kino ki tiar pynmynsaw ha kitei ki jaka. U DM u la pynjari ba katei ka hukum kan treikam mardor naduh ba mih kane ka khubor tad haduh ba la pynmih da kawei pat ka jingpynbna.
Lah ban pynkynmaw ba ka high Court ka la khot hajir ia u bah Adelbert Nongrum ha ka 27 tarik mynta u bnai ban ai jingshai halor ki jingkren jong u kiba la mih ha ki kot khubor kiba u nongbishar u S.R Sen u la ong ba ki dei ki jingkren pyrshah u bah Adelbert ia ka ing bishar.