Kyrshan ka NPP, ia ka sorkar MDA, kaba la tem na ka jingeh jong ka bording bad ka umphniang

Shillong: Hadien ki jingshah kren kiba bun halor ka dor ka mur jongka umphniang bad ka jingpynlip lait, U nongialam ka NPP Shillong City u Bah Bah Anthony N. Nongbri, uba dei ruh u Working President ka party u la wan shakhmat ban pynshai paidbah bad ban ai ka jingkyrshan ba pura ia ka sorkar MDA kaba la leh ia kaba bha tam, da kaba sngap ia ka sur bad ka jingdonkam jong u ba bun ba lang.

Haba kren sha ki nongpathai khubor, mynta ka sngi ha ophis ka party ha Lachumiere, une u nongialam u la pynpaw ia ka jingsngew sarong namar ban ioh ia ki nongialam ka jylla ki ba kat ki nongialam, kiba la lah ban pynioh pat iaka bording ha ipor ibalyngkot eh.

Haba iathuh ba kane ka dei ka sien ba nyngkong eh ha ka history jong ka jylla bad ka bym pat ju jia khoit, ba ha i por i balyngkot, kata 48 haduh 72 kynta la lah ban weng ia ka jingeh ki paidbah na ka jinglip lait. U la ong ruh ba kane ka jingpynioh pat iaka bording, ka kren shai iaka jinglah jong ki nongialam ka sorkar MDA ban ia kren bad kibor ba kham hajrong da kaba siew iaki ram ki shah, kiba naduh ki snem kiba mynshwa bad kiba ka sorkar Congress ba rim ka khlem la shim khia ban siew.

U Bah Nongbri u la ong ruh ba ka jinglah ban pynioh iaka bording, ka pyni iaka jingmut jingpyrkhat jongki nongialam sorkar hapoh ka jingialam u MyntriRangbah, U Conrad Sangma, kiba sngewthuh iaka khia kashon ka jong u paidbah, khamtam ka jingdonkam jong ki khynnah skul bad kolej, kibakum ha kinekipor, ki donkam ban pynkhreh lane ialeh iaki eksam jongki. Ym kum kiwei pat ki sorkar kiba shukren tang da ka ktien, ka sorkar mynta ka la leh shisha daka kam namar ka jingsngewthuh jongka iaka dor jongka jingpule bad ka jingkhuslai jongki kpa ruh.

Ha kaba iadei bad ka mynsiem ka jing iatreilang pat, u ne u nongialam u la ong ba u sngewsih ban iohi ha kine ki sngi ka long ka bym itynnad , namar la iohi ia ka jing phoilian jongki nongshim kabu, kiba haba ki iohi ia i jingduna i barit kat i phlang, ki pynheh pat kat ka khlaw.
U la ong ruh ba ka long basuk ban syllad ia ki riewtrei kum ba lah iohi kumno ka seng Congress bad kiwei kilah leh ia kata. Hynrei haba kren ia ka jingshisha, ka jing pynlip lait ha kiwei pat ki jylla ka long kaba kham jlan bad khamsyrtok. “Ngim dei ban klet ba ngi im ha ki por kiba jwat namar ka Covid, wat la katta, hapdeng ki jingeh, phi lah iohi ba kane ka sorkar ka trud iaka maw ka dieng ban pyndap iaka jingdonkam jong u paidbah” ong utei u rangbah.
Ha ba ia nujor ia ka jing pynduna bording ha Meghalaya bad ha kiwei pat ki jylla ha kum kine ki aiom tlang ka jingpynduna bad jing pynlip lait kyllum ka long kumne ha Nagaland ka jing pynliplait ka neh 6 kynta, ha Arunachal Pradesh ka jing pynlip lait ka neh 5 kynta bad ha Assam ka jingpynlip lait ka neh 5 kynta. U bah Nongbri u la ong da ka ba kdew kumne kam mut ba ngi kwah baka Meghalaya ruh kan poi sha ta, hynrei, ka shu long tang ban ia tip lang iaka jinglong jingman jongki para mar jan.
Ha kaba iadei bad ka jingpynhiar dor ia ka khajna Umphniang Petrol bad Diesel, sa shisien u la ong ba ka jinglah jongka Cabinet ban pynjem ia ka dor jong ka petrol bad diesel, ka dei ka jing sngap lang jong ka sorkar iaka khia ka shon jong baroh namar kata u la ong ba ki paid nong shong shnong ka jylla baroh kawei ki dei ban sngew kmen namar ka dor jongka petrol bad diesel ha Meghalaya kadei kaba duna tam ha ri India bad ha Northeast
Haba ia nujor ki dor ki long kumne:
Chennai- Rs 92.77
Delhi – Rs. 89.54
Kolkatta – Rs. 91.65
Mumbai – Rs. 96.41
Meghalaya – Rs 85.86 (kaba duna tam)

Ha Northeast pat ki dor ki long kumne

Nagaland – Rs 91.96,
Assam – Rs 86.66,
Tripura – Rs 88.77,
Manipur – Rs 93.33
Meghalaya – Rs.85.86 )

U bah Nongbri u la ong ba ka jing kdew kumne ka pyni shai iaka jingdon mynsiem jong kane ka sorkar, bad kine ki jingkdew haneng ki pyn shisha baki jing kynnoh ba kane ka sorkar kadei kaba lalot, kidei tang ki sur bym don nongrim bad ki surkyang ha rikhlaw.
Na ka liang jongka NPP, ka kwah ban ai ka jingiaroh ia ka sorkar MDA, namar ka jingkloi bad jingtrei shitom jongka ban tem ia kine ki jingeh jong u ba bun ba lang.