Sdang pynkha khun ha Lawmali rT.7spah ia ki nongkyndong ba kha khun

Shillong, 21 ’lyngkot:
Ki longkmie kiba kha khun ha hospital sorkar, kin ioh pisa na ka sorkar pdeng khlem da khein katno ngut ki don khun bad ia kane, bad ia kane la ai na ka Janani Suraksha Yojana (JSY) naduh mynshem snem ha u bnai Nailur.
Kawei ka kyndon kaba ki dei ban leh ban ioh ia kane ka pisa ka long ba ki longkmie ki dei ban leit shah peit ha ki jaka sumar ka sorkar lai sien bad kin ioh ia ka maternity card.
Kane ka jingai pisa ka long T. 6 spah ia ki longkmie ba dei na jaka sor bad T. 7 spah ia kito ki longkmie kiba dei na jaka nongkyndong na ka skhim Janani Suraksha Yojana (JSY) kaba hap ha ka National Rural Health Mission (NHM). Ban ioh ia kane, ki dei ban thiah tang ha ka general ward ka hospital sorkar.
U Medical superintendent ka Ganesh Das Hospital, Lawmali Shillong u Dr T Wahlang u la iathuh hynne ka sngi Nyngkong ba ia kane ka skhim ban ai pisa ia ki longkmie kiba wan kha khyllung ha hospital naduh u Nailur 2014. Ki bym don ia kane ka maternity card, kin nym ioh ia kane ka pisa namar ba kane ka dei ka kyndon ba la buh da ka sorkar.
U la iathuh ba shwa u Nailur, 2014, ia kane ka JSY la ju ai tang ia kito ki longkmie kiba kha khun tang ar ngut hynrei mynta la ai lut tangba ki dei ban don ia katei ka maternity card ban pyni ne pynshisha ba ki la leit shah sumar lai sien ha kano kano ka jaka sumar ka sorkar shwa ba kin kha. “Tang kiba kha im ki lah ban ioh ia kane ka pisa”, u la ong.
U la iathuh ba kila don bun kiba ioh pdiang ia ka pisa haduh mynta.
Ha kawei ka liang, u Dr Wahlang u la iathuh ba ia ka jaka kha khyllung ha Lawmali kaba la shah bam duh ha ka ding mynshem, la dep maramot bad la pdiang pdiang biang ia ki longkmie ba wan kha khyllung.
Ka jingpdiang ia ki longkmie ba wan kha khyllung, ka la long naduh u Naiwieng u snem ba la dep naduh ba ka la pluh ka jaka kha khyllung, la ong u Dr Wahlang bad bynrap, ba ka jaka kha khyllung ka la kham bun mynta na ka san tylli kaba mynshwa, la pynkiew sha ka hynniew tylli shisien kha.
Lah ban kdew ba ha ka 6 tarik Risaw, 2014, por 5 baje janmiet ka hospital Ganesh Das ba seng ha u snem 1935 ha Lawmali ka la kem ding kynsan hadien ba u transformer ka MeCEL kaba don syndah kane ka hospital, u la bthei.
Kane ka hospital ka dei kaba bun kiba wan shah sumar bad wan kha khyllung ki dei na jaka nongkyndong namar ba ka dei jong ka sorkar.
Ha kane ka jingjia ka kamra kha khyllung ka la ing khong khait hynrei donbok ba ki nongpang ki la lait thaw na ka jingjia ba sngewsih hadien ba ki bor hospital ki la pynkynriah wut wut sha jaka ba lait na ka jingma.