Shillong:U symbud Myntri Rangbah ka jylla u Bah Prestone Tynsong, u la maham ïa ki nongñiah kali ba lada kim ïatreilang bad ka Sorkar na ka liang ka Sorkar kam banse ban pynmih noh da ki jingai jingbit ïa kino kino ki kali kiba kwah ban kamai ne additional permit.
Ïa katei u la ong myn hynnin ka sngi haba kren kum u kongsan ha Kenches trace haba kren ha ki nongthoh khubor.
Na ka liang u Bah Prestone u la ong ruh, ha kajuh ka por ba ki nonghikai kim dei ban shu leh khluit ha kaba ïadei bad ki jingeh jong ki namar ka Sorkar ka dang shong pyrkhat kam ha kaba ïadei bad ki jingeh jong ki.
Ha kaba ïadei bad ka jingkwah ban khot ïakren jong ka Joint Action Committee jong ka seng ki nongñiah taxi halor ka jingdonkam ban pynduna ïa ka khajna bad ka dor petrol bad diesel, na ka liang u Bah Prestone u la ong ba ïa katei ka jingdawa jong ki na ka liang ka Sorkar ka dang shong ban ïakren bad hadien ba la dep kan sa shim ïa ka rai kaba ïa biang lang.
“Kumba ju long naduh mynshwa ngi kwah ba ka petrol bad diesel kan dei ban duna bha ha Meghalaya ban ïa ka jylla Assam,” ong u Bah Prestone.
U la ong ruh ba na ka daw jong ka jingkiew ka dor petrol ha ka pyrthei baroh kawei, ka la wanrah jingeh, kumta ka sorkar kan sa shim khia bha bad ha u taiew ban wan yn lah ban shong jingïalang halor kane ka bynta.
Halor ki jingartatien jong ki nonghikai halor ki khajna ba la leh da ka Sorkar, u Bah Tynsong u la ong ba ki nonghikai kim dei ban artatien, hynrei ki dei ban shaniah ha ka Sorkar bad lada ki artatien ki lah ban wad RTI ban lap ki jingshisha.
Ha kawei ka liang na ka liang u Bah Prestone u la kyntu ïa ki nongñiah kali taxi ba kin sangeh noh ki jingiakhih jong ki namar ka la ktah bha ïa ka kamai kajih jong ki bad ka la ktah bha ïa ki paidbah bad ailad ïa ka Sorkar ba kan peit bniah ïa ki jingeh jong ki.
Phi don ban ong eiei?