Sangah ka MLA Congress, ba mynthi ka sorkar, ia ki nongniah kali kamai

Shillong:Ka MLA jong ka party Congress ka Dr Ampareen Lyngdoh ka la pynpaw ia ka jingsngewkhia, halor ka jingsngap mynthi jong ka sorkar Meghalaya Democratic Alliance ia ka jingiakhih jong ki nongniah kali kamai kaba la neh 10 sngi mynta.

Haba iakren bad u Rupang ka Dr Ampareen, ka la ong ba ka sorkar MDA kam don ka jingkitkhlieh bad ka iaid kyllut, khlem ka jingkyrkieh ban weng noh ia ka jingeh jong ki nongniah kali bad kane ka iohi la kumba ka jylla Meghalaya kam don sorkar.

“Haba don kum kine ki jait jingiakhih ka sorkar ka dei ban khot iakren mardor bad ban sngap ia ki jingeh jong ki, khnang ba kan lah ban tem noh ia ki jingiakhih, namar na ka jingiakhih ki nongniah kali ka wanrah jingeh ia ki paidbah hi baroh”ka la ong.

“Mynta la 10 sngi ka la neh ka jingiakhih bad ka la ktah bha wat ia u nongniah kali u ba iakhih ruh, hynrei ka sorkar kam shem la shimkhia ia kane ka mat ka ba pynthut ia u paidbah” ka la ong. Ka la ong ruh ba lada ka Deputy Commissioner kan hap ban shim ia ka sienjam ban long kum ka nongiasaid ha khmat u paidbah kamut ba ka sorkar jylla ka long ka ba matlah ia kine baroh.

“Ngam thew ba ka Deputy Commissioner kam long ka ba biang ban tuklar ia ka jingiakhih hynrei mynta la 10 sngi ka la neh ka jingiakhih la dei ka kamram jong ka sirkar ba kan shimkhiah bad ban iakren halor kaei ka nongrim ba ki nongniah kali ki ia khih”ka la ong.

Halor ka jing pynhiar ka Sorkar T.2, ia ka dor Umphiang ka Dr Ampareen ka la ong ba ka jingpynkiew ia ka dor petrol, ym ba ka ktah tang ia ki kali hynrei kan ktah lut ia ki marbam mardih ha ka ba kan ktah hi ia u paidbah sa shisien. “Ka jing pynhiar ia ka dor petrol diesel da 2 tyngka jong ka sorkar MDA ka dei ruh ka rai ba la shim tang marwei bad kabe ka rai kam long ka ba iahap”ka la ong.

Ka la ong ruh ba haba don kano kano ka jinglum ia ka khajna kyrpang (Cess) da ka sorkar jylla ka dei ban long da ka jingiamir jingmut kaba thikna. Ka khajna kyrpang ka dei ban iaid ryngkat bad ka kyndon ban pyndonkam ia ka bad ym lah ban shu kam ba ka lum ia ka cess ka dei na ka bynta kata ka mat.

Ka la iathuh ruh ba ha ka por ba ka sorkar ka don ha ka bor la ju lum ia ka khajna kyrpang hynrei kane ka long da ka jingia mir jingmut lang.”Ngi donkam ban ia phylliew jingmut bha namar ngi dei ki nongmihkhmat jong ki paidbah bad kano kano ka jingleh jong ka sorkar kadei ban long ka ba bha na ka bynta u paidbah bad da ka jingiamir jingmut bha shuwa” ka la ong.