Jowai: Ka West Jaintia Hills District Executive Force (WJHDEF) lyngbaka tnad Traffic Branch mynta ka sngi ka la ai sngewbha da u Syntiew Kulab sha kito kiba pynkhein iaka ain niah kali namar ba dei artad ka sngi ba ki samla ki rakhe iaka Valentine Day.
“Kum ka dak ban wanrah iaka jingshngain ha ka leit ka wan khamtam kito kiba niah kali, ngi la leh ia kane naka bynta ban hikai ia ki riew paidbah ba kidei ban husiar haba niah kali ban lait na kino kino ki jingaksiden khamtam haba niah khlem akor bad niah kali khlem da bud satia ia ki kyndon jong ka ain”, la pynpaw uwei na ki pulit haba sam da u syntiew sha kito ki ba pynkhein ain.
Ki pulit ka West Jaintia Hills ki la leh ia kane ha ki bynta bapher bapher kynthup ha ka Nongbah Jowai, ha Dawki, Amlarem, Phramer bad ha Ummulong.
Barabor haba ki nongniah kali ki pynkhein ain, ki pulit ki ju dain kuna ia ki hynrei mynta ka sngi ha ka jaka ka kuna la sam pynban da u Syntiew Kulab bad kumjuh da ka jingsneng jingkraw ba ki dei ban burom ia ka ain na ka bynta ban lait na kino kino ki jingma jingmynsaw bad ki jingjia ba sngewsih haba niah ia ki kali.
Phi don ban ong eiei?