Shillong, 21’lyngkot:
Mynhynnin ka sngi ka 20 tarik u kyllalyngkot ki Daju ha Iewduh ki la duh sngi baroh shisngi, lut bai bam, lut bai kali khlem kamai shipiah ruh namar ka jingshah bat ha ka hima Mylliem ba kim shym la kohnguh ia ka ain ba ki dei ban phong sopti kaba shongdor T.500, haba ki kit jingkit ha Iewduh.
Kham hadien kitei ki Daju ki la leit ban ud sha ka seng HYC halor ka jing bym shah ka Hima Mylliem ba kin kit daju khlem sopti jong ka hima bad ha katei ka jing iakynduh ka HYC ka la ong ba ki la dep ia kren bad ka hima ba kan sangeh shuwa shipor ia ka jingbat Daju ha Iewduh, katba ki ar-ngut ki myntri ka hima Mylliem ba kynthup ia u myntri K Langstieh bad u myntri M.B Kharlukhi ha ryngkat ka jingdonlang u syiem khynnah ka hima Mylliem ki la ong ba mynta ka sngi ruh kin bteng ia katei ka jingbat ia ki Daju kiba khlem phong sopti hima ha Iewduh bad ki la kyntait ba ka don ka jingiarai lane ka jingiasngewthuh jingmut hapdeng jong ki bad ka HYC ba yn sangeh shuwa shipor ia ka jingpynphong ia ki sopti jong ki Daju ha Iewduh.
Hynrei la iohi ba katei ka jingkren ki myntri ka hima Mylliem ka la kylla pynban da khongpong , ha kaba mynta ka sngi la iohi ba baroh ki Daju ha iewduh ki kit nong khlem da phong ia ki sopti jong ki bad ki iaid sahuh hai hai kumba ju leh ha ki por ba la dep, hynrei la iohi ba na ka liang ka hima Mylliem kam shym la nud saham eiei ia ki.
Halor katei ka jingiakren mynhynnin ka sngi bad ki myntri ka hima Mylliem ka HYC ka la ong ba kan leit ban ia kynduh ia u CEM ka KHADC u bah Adelbert Nongrum ban ia kren halor katei ka jingeh ki daju, hynrei haba ia kren pat bad u Vice President ka HYC Central Body u samla Donbok Kharlyngdoh u la ong ba ka seng kam shym la ioh ia kynduh ia u CEM, namar ba u don jingialang bad shen kan sa leit ban ia kynduh, “Hynrei mynta ka sngi te kam shym la don shuh ka jingpynthud ia ki Daju ha Iewduh, wat la ki kit khlem phong Uniform ruh” ong u samla Donbok.
Lah ban pynkynmaw ba ha ka jingiakren bad ki nongthohkhubor mynhynnin ka sngi na ka liang ki Daju Iewdu ki la pynpaw ba ka daw ba kim treh ban phong sopti hima, ka dei namarba ka dor jong ka ka la rem palat bad ka dor ka iahap haba ia nujor bad ka jain. Ki la iathuh ba ka dor jong ka uniform ka long T.525 tyngka kheinlang bad ka bai rejistar.
Phi don ban ong eiei?