BALEI IA NGA

S.K.N

[ba bteng] Ka Niakha ka la don ka jingsngewthuh malu mala ia ka jingkwah buhrieh ka Kmie ka Rida. Ha la ka mynsiem ka la i suba sniew bha ia ka rukom jinglong ka met ka Rida. Hamar kata ka por la wan mih ka Rida bad ka sha, ka kup bad i tapmoh.
“Dih Niakha…” La ong ka Rida
“To, shong hangne khun ngin ia dih lang..” La kyntu ka Niakha
Ka Rida ka la shong hangta. Ka Niakha ka la peit shlip sha ka bad ka sa kylli
“Phi pang kumno khun?”
Ka Rida ka la jnang ban jubab bad ka la shu ong

“Tip ngam sngewthuh sngew thaw.. Niakha”
“To, phi tip nga wan wad noh ia phi kumne namar ba nga ioh khubor na ki nonghikai jong phi ba phi la pep klas la bun bnai.. Ka dei kata..?” La buh jingkylli pat ka Niakha
“Hooid Niakha..” La jubab ka Rida bad ka la sdang ruh ban iam
“Dih ka sha khun wat iam, lada phi kloi ban leit noh mynta ruh biang; hynrei lada phim kloi mynta ngan sa wan shaw lashai ban leit shim dawai” la ong ka Niakha
Marsien ioh sngew ia kane ka ktien, ka Kmie ka Rida ka la long kumba dung da u khnam.
Ka Rida kam nang jubab eiei ka shu sngap jak.

“Ngi la wan shim dawai Niakha, mynta ruh ka dang dih dawai…” La iathuh ka Kmie ka Rida
“I pang kumno kein…” La kylli pat ka Niakha
Hangne ruh la eh taw ban jubab, ka Kmie ka Rida ka la shu ong noh
“Ka don la ka jingpang, tip kane …” La kren bym sngewthuh ka Kmie
Ka Niakha ka la nang suba sniew namar ka la ithuh ruh na ka jinglong ka met jong ka bad ka rukom kup jain tapmoh. Hapoh la ka mynsiem ka la kiew dom riang ia ka jingarsap jong ki da ka ktien ba dukhi ka ong kynsan
“Wei haba phim iathuh hok mat dep shato… ” ka peit la ki khmat sha ka Rida.
Ka Rida ka la shu iam bad jaw jrup shi jrup ki ummat na ki arliang ngab.
“Balei pha buhrieh Rida…?” La ong pat ka Niakha
Ki khun jong ka Niakha kiba ia wan lang ki la jaw ummat lang namar ki ithuh ba don kaei re kaei kaba eh ia ka Rida ban iathuh.

Ka Niakha ka nang dom bad ka ong kynsan
“Ka jingpang aiu kum kane ka bym long ban iathuh ruh… Khreh lashai shu leit beit sha Hospital bad nga..”
U Panah uba don ha kamra thiah, katba u nang sngap ia kaei kaba ki iakren u la nang khuslai mynsiem.
“Ta te lawai artat ia nga…” U ong marwei marwei.
“To Niakha, ngan kohnguh ia phi..” La phai ktien ka Rida
Mar kumta hi ka Niakha ka ieng noh na jaka shong bad ka khreh ban leit noh.
“To, Rida sa khreh ngan wan lashai dang step mynta ngan leit noh shuwa mo…” La kren pynkut ktien ka Niakha
“To Niakha..” La jubab ka Rida
Ka Niakha ka mih noh syndon nangta.

Hadien ba mih ka Niakha, la mih ka jingiania bajur, ha iing hapdeng ka Kmie bad ka Rida halor ka jingkohnguh ban leit hospital. U Panah ruh u la iakren lang
“Kumno Rida phi treh ban leit haba nga la wan shim dawai kumto ruh. Long phin leit leh aiu kein sha hospital..?” La buh jingkylli u Panah
Ka Rida shiphang ka la shu sngap. Hynrei namar ba u Panah u iai kylli shi kylli ka la jubab noh
“Te i Niakha namar ba i ieid ia nga bad i la kitkhlieh ruh ia nga nadong shadong ngan ym kohnguh kumno..” La phai ktien ka Rida
Ka jingiapyni nia kaba jur bha ka la mih. Ka Kmie jong ka bad u Panah ki la pynbor ba kan ym leit shuh. Hynrei ka Rida pat ka ieng marwei ban leit beit jia katba jia. Ha kata ka miet namar ba ki la byrthen than, ka Rida ka la leit thiah noh khlem bam khlem dih. [yn dang bteng]