Pyllait im ki BSF ia u nonghikai

Shillong, 21’lyngkot:
Ki shipai BSF jong ka 36 Bn kiba don ha South Garo Hills district ha BOP Fakirakona ki la ioh pyllait im ia uwei u nonghikai barim uba la tip kyrteng kum u Sh Robinson R Marak, 65 snem karta katba ki nongrahbor ia u ki dang thmu ban pynkynriah na kawei ka jaka sha kwei pat kaba ki sngew shngain ha khappud ka Bangladesh. Ha ka 20 tarik, mynta u bnai katba ki nongrahbor ki dang iaid ha pud India bad Bangladesh ha ka mynmiet 7:40 baje ban rah ia uba shah rahbor ki shipai BSF ki la kthong ia ki, hynrei ki la ioh phet krad noh ha ki khlaw ba rben hapdeng ka jingdum ka miet. Ha katei ka jingkthong ki la ioh ban bat ia uwei u briew uba la tip kyrteng kum u Robinson R Marak, bad hadien ki la lap ba utei u rangbah u la shah rahbor na ka jaka sah jong u na ka shnong Chambalgiri, Baghmara PS , South Garo Hills naduh ka 17 tarik u nohprah, 2014. Kham mynshuwa ha ka 29 tarik u nohprah, 2014 uwei u nongrahbor u la shah pyniap ha khappud India bad Bangladesh ha BOP Debram ha ka jingleit khynra jong ki BSF bad pulit, katba u dang pyrshang ban rahbor ia utei u nonghikai ba la ioh pyllait.