Ba shah kren khlem akor ka nongtrei Khasi, pynjulor ki paidbah ia ka Tourist Taxi ha Pahammawlein

Nongpoh: Kawei ka kali kamai Tourist Taxi kaba don ia number ML-05-L-1345, kaba la niah da uwei u bar jylla, ka la shah pynjulor hi thiaw ha ki paidbah ka shnong 20 Mer Pahammawlein, Ri Bhoi District, kata hadien ba la mih ka jingkynnoh ba utei u nongniah Tourist Taxi, u la kren da ki kyntien tohmet ia kawei ka samla Khasi kaba trei ha Toll gate kaba don ha katei ka shnong.

Ha katei ka jingbitar ki paidbah, ki la shu ioh ban pynjulor tang ia ka kali, hynrei ia u briew kim da iohlad ban ktahkti ne ban pynmynsaw ia utei u nongniah, namar ka jingwan poi kloi ki bor pulit na Byrnihat Police Outpost bad kiba la lah ban tehlakam ia ka jingbitar ki paidbah bad kiba la rah noh ia utei u nongniah sha thanad.

Katkum ka jingiathuh da kawei ka khynnah kaba dei ruh kaba la shah kret tohmet ha utei u nongniah, la ong ba katei ka Tourist Taxi, ka dei kaba hiar na ka nongbah Shillong sha Guwahati, hynrei haba la poi ha katei ka jaka khrong khajna, la mih ka jingiania halor ka rukom siew khajna, nangta u la pyrshang ban ring Vedio bad hadien kata u la kren tohmet ruh ia katei ka samla Khasi.
Haba batai halor katei ka jingjia, katei ka samla ka la ong, ba kum ka nongtrei ha katei ka jaka, kam banse ban kohnguh ia ka jingbthah ki bor bahalor ka NHAI bad kata ka long ba ia ki kali ki bym don Fastag ki hap ban siew ar-shah na kaba ki dei ban siew, kumta haba katei ka Tourist Taxi kam don Fastag, katei ka samla ka la pan na utei u nongniah ba u dei ban siew ia ka dor kaba long ar-shah na kaba u dei ban siew.

Haba ym lah shuh ban kren pynsngewthuh ia utei u nongniah, katei ka samla, ka la ong ia u ba u iaid shakhmat ia ka kali jong u bad ba un leit kren sha ki briew ka NHAI kiba don ha katei ka jaka, hynrei watla katta utei u nongniah um shym la pynsngap satia, hynrei u bteng ka iania bad u la sei ia ka mobile da ka jingthmu ban ring Video ia kawei na ki nongtrei, ha ryngkat ka jingkren ia ki kyntien khlem akor kiba ktah ia ka ijot bad ka longrynieng jong ka kynthei bad dei na katei ka daw kaba la pynbitar eh ia ki briew ha katei ka shnong.

Haba iadei bad katei ka jingjia, na ka liang ki samla kynthei kiba trei ha katei ka jaka, ki la ujor da ka Ejahar pyrshah ia utei u nongniah kali, halor ki nongrim ba u la kren tohmet ia ki.