Byrngem ki kali kamai na Laitlyngkot, ban aiti noh ia ki permit kali; lada ka Sorkar ka ailad ban kamai ia ki kali shimet

Shillong: Katba ha kylleng ki jaka ha ka jylla Meghalaya ki dang iakhih ha kaba iadei bad ka jingkiewdor palat ka petrol bad diesel ha ka jylla kaba la ktah shikatdei eh ia ki nongniah kali kamai bad ia u paidbah ruh kumjuh, phewse la iohi pynban ia ki nongniah kali shimet kiba la shim kabu ban kamai.

Na ka liang jong ki nongniah kali kamai na Laitlyngkot, ha ka sngi ba ar, ki la pynpaw ia ka jingbitar ban iohi ia kane ka jingleh jong kine ki riew shim kabu ban kamai beit wat hapdeng ka jingiakhih ban pynhiar dor ia ka petrol bad diesel.

U President ka Laitlyngkot Taxi Drivers And Owners Association, u Bah B Khongbuh bad u Bah M Rynjah u ba dei u President ka Laitlyngkot Taxi Welfare Association, ki la pynrem jur ia ki kali shimet kiba la shim kabu pynban ha ka jaka ba kin iasnoh kti lem ha ka jingiakhih ban dawa na ka Sorkar ba ka dei ban pynhiar mardor ia ka petrol bad diesel.

Ha katei hi ka sngi ki nongniah kali kamai ki la pynlong ia ka jingiakhih ryngkat ki placard ban pynrem bad pyrshah ia kine ki kali riew shimet kiba shim kabu. Ki la don ruh ka jingialang ha madan phutbol ka Elaka Laitlyngkot bad na ka liang jong kine ki nongialam ki la byrngem ruh ia ka Sorkar ba lada ka ailad kumne ia ki kali shimet ba kin kamai paidbah, ki ruh kim banse ban aiti noh ia ka permit kali jong ki namar ki kali shimet kim hap siew ka bai khajna kumba siew ki kali kamai.