Byrthen mih madan biang ki nonghikai, hadien ka 18tarik Rymphang

Shillong: Ki nonghikai SSA hapoh ka lama jong ka Meghalaya SSA School Assiociasion mynta ka sngi ki la wan ban buh ia ka dorkhas ia u myntri ka tnad pule u bah Lakmen Rymbui, ban dawa na ka sorkar ban pyntrei kam ia ka Salary Structure bad ban pynkiew ia ka tulop jong ki.

Haba ia kren bad ki lad pathai khubor, u bah Aristotle Rymbai, President ka MSSATA u la iathuh ba ka jingwan jong ki ban buh ia ka dorkhas sha u myntri ka tnad pule jong ka sorkar, ka long ban dawa ban pyntrei kam ia ka salary structure bad ban pynkiew tulop ia ki kum ki nonghikai regular jong ki skul sorkar.

U bah Rymbai u la ong ruh ba na ka liang ka association ka la buh ruh ka por ia la sorkar ba kan pynurlong ia ki jingdawa jong ki hapoh la 18 tarik mynta u bnai, lem kumta ki nonghikai SSA kin mih madan biang ban pynurlong ia kine ki jingdawa jong ki 12,541 ngut ki nonghikai SSA ki ba kynthup ia ki lower primary bad upper primary.

U bah Rymbai u la ong ba ka jingdawa jong ki ia ka salary structure bad ban siew tulop ia ki nonghikai SSA kum ba siew ia ki nonghikai regular ka long kat kum ka provision jong ka RT act 2009 bad jong ka State RT Rule 2011 ka ba la byhah ia la sorkar jylla ba kan pyntrei kam ia ki salary structure bad ka tulop kan long ki nonghikai regular.

Katkum ka jingpynshai jong u symbud myntri rangbah ka jylla u bah Prestone Tynsong ba ka tax jong ka umphniang ka dei na ka bynta ka tnad pule puthi na ka liang ki nonghikai SSA ki la pan ia ka jingpynshai ba ia ka T.367 klur ka khajna, ba ki la lum ki pynlut ha kano ka bynta jing ka tnad pule puthi.