Soi soskular ka JHADC, ban lum khajna ki Dolloi

Jowai:Ka JHADC myn hynnin ka sngi ka la iasoi ia ka soskular kaba la tip kum ka memorandum of Understanding, hapdeng ka JHADC bad ki Dolloi na ka bynta ban ai bor ia ki dolloi ban lum khajna noh na ki paidbah ka ri lum Jaintia khamtam ia u mar rep kiba pynmih na khlaw bad kumjuh ia u Shyiap, u Mawria bad kiwei kiwei.

Kane ka long katkum ka jingrai ka iingdorbar kaba la dep ha kaba ka iing dorbar ka la mynjur ia ka resolution kaba la wanrah, wat hapdeng ka jingpyrshah jur kaba na ka liang pyrshah, kat haduh ba ki dkhot ka BJP ki la hap ban mih jyndat noh na iing dorbar.

Katkum katei ka resolution la aibor ia ki Dolloi ban lum khajna bad ka jingmih baroh kan long 40 la 60 ka bhah hapdeng ki Dolloi bad ka JHADC.
Halor kane ka jingiasoi ia katei ka ‘Soskular ia sngewthuh Jingmut’, na ka liang bad kumjuh halor katei ka rai ban ai bor ia ki dolloi ban lum khajna na u paidbah ka rilum Jaintia da kaba buh ia ki khyrdop ha man la ki Elaka ka la wanrah ia ka jingpyrshah jur na ki lai ngut ki MDC ka BJP, u ma Lakhon Biam, u ma Dawan Lyngdoh bad ruh na u ma Krison Langstang.
“Ngi la lait na ki kti jong u phareng uba la wan ban lum khajna na ngi bad mynta da ka District Council ha ka jaka ban kan iada ia ngi na ki khajna ka sorkar India nalor ba ngi dei ki riewlum, la wanrah pynban da kum katei ka ain ban khrong khajna kum ha ka por jong ka British Raij”, la ong u ma Lakhon Biam.

Kitei ki lai ngut ki la pynpaw shuh shuh ba kane ka Executive Committee ka JHADC hapoh ka jingialam u Ma Thombor Chiwat CEM JHADC, ki la hiar sha ki Cement Factory ha Lumshnong ha u snem 2020 da ka jingthmu ban buh ia ki monitoring gate, hynrrei hangne kim nud ki la buh pynban ban khrong na ki mar rep kiba mih kamai da ki tyngka ki leh klet pat ia Kine ki Factory kiba pynmih da ki klur.
“Ngi ki MDC ka BJP, ngi pyrshah jur ia kane bad ngi pynrem ruh ia kane ka EC kaba nang ban wad da kiwei ki lad nan pynmih pisa hynrei ki shu lute na u rit u ria” ong ka khubor na ki MDC, ba kynthup ia U Ma Dawan Lyngdoh, Krison Langstang, Lakhon Biam.