Ther ka HNYF Ri Bhoi, ba mynthi ka sorkar halor ka jingeh ki paidbah, nongniah kali

Nongpoh:Ki nongialam ka HNYF, Northern Region, ki la ther tyngeh ia ka sorkar jylla, halor ka jingmynthi jong ka ban kren ia ka jingeh kaba la iakynduh da ki paidbah bad ki nong niah kali kamai, namar ki nongniah kali kamai ki iakhih ba la kiew dor palat ka Umphniang Petrol bad Deisel, katba ki paid bah pat ki shem jingeh ban ioh kali, haba ki thmu ban leit sha kano kano ka jaka bad kaba la pynthut eh ha ka leit ka wan u paidbah.

Haba kren sha ki lad pathaikhubor, u Bah Marcus Marten, President ka HNYF, Ri Bhoi lem bad u Bah Donroy Kshiar, ki la pynpaw ba kane ka jingsangeh mih surok ki kali kamai, ka la wanrah jingeh ia ki paidbah bad khamtam eh na bynta kito kiba thmu ban leit shim dawai, ia ki khynnah skul, college bad ia kito kiba thmu ban leit sha ki jaka trei bapher bapher.
Kitei ki nongialam ka HNYF, ki la pynrem jur ia kane ka sorkar, da kaba kynnoh ruh ba kane ka sorkar, ka la shu bunkam tang ha ki kam bamsap khlem da pyrkhat shuh ia ka jingeh kaba la iakynduh da u paid ba bun balang, u kup u sem shiliang, uba im da kaba bylla sngi ban pyndap ia ki jingdonkam ha iing ha sem.

Shuh shuh, kitei ki nongialam ka HNYF, ki la buh jingkylli ia ka sorkar jylla ba shano jah ki khajna mar por khyndew naduh u Dewiong, Mawshun bad kiwei kiwei kiba ka khajna ba la ioh lum na ki khyrdop Weighbridge lem na kiwei ki jaka, ha kaba ki la pynpaw ruh da kaba ong ba imat ba baroh ki Khajna kiba la sorkar ka dei ban ioh, ki la leit lut sha ki pla jong ki riew shimet jongno re jongno, katba ki khajna pat ki nangkiew katba nangmih ki sngi bad kaba la ktah eh ia ki paidbah ha ka jylla hi baroh kawei.

Kitei ki nongialam ka HNYF, ki la kren shai sha ka sorkar ba lada ka sorkar kam ioh khajna na ki marpoh khyndew, ka seng kam banse ban lum ia ki dkhot ka seng, na ka bynta ban leit sha ka khyrdop Weighbridge, na ka bynta ban peit ba haduh katno ka jingduna khajna jong ka sorkar bad khamtam eh ia ka khajna na u dewiong.

Namarkata, na ka liang ka HNYF ka kyntu jur ia ka sorkar jylla ba ka dei ban shimkhia halor kine ki kynrum kynram, kaba ki nongniah kali kamai ki la hap ban shim ia ka sienjam ban sangeh mih surok bad kaba la pynjynjar eh ha ka leit ka wan ki paidbah.