Ka khajna na ka umphniang, dei ka ain niewbein paidbah, ong U bah Ardent

Shillong:U Bah Ardent Miller Basaiawmoit, u Convener jong ka Revolution Ïada La Ka Ri, u la pynpaw ba ka long kaei kaei ka ba sngewkhia ba ki paidbah kin hap ban mih shakhmat ban pynpaw ia ka jingdawa halor ka jing nion bein jong ki briew ba shimti ia ka kam (helm of affairs). U la ong ba ka rai jong ka sorkar jylla ban lum ia ka khajna ia ka umphniang, ka dei ka ain niew bein paidbah, kaba la wanrah ia ka jingktah kaba jur ia ki paibah ka jylla kham tam ia u duk u suk uba kamai jakpoh da la ba shu bylla bad kane ka la ktah ia ka ioh ka kot jong ka jylla.

Ka nia ka ba la pynmih na ka sorkar jylla halor ka jinglum jong ka, ia ka khajna na ka um phniang ka long ka bym lah ban pdiang da leilei ruh,dang shen ka sorkar jylla ka la pynbna ba ka sorkar ka la pynduna ia ka bai umphiang da T.2; kane ka long ka ba duna palat bad ka ba la dier pat bad kadei ruh tang ka kam pynthame jong ka sorkar ia ki paidbah.

Ha ka jingshisha, lada ka sorkar ka don shisha kata ka jingthmu ban pynsting ia ka jingeh jong ki riewpaidbah ka la dei ban shim shuwa ia ki katto katne ki lad ki lynti ban ia kaba ki pyntreikam ia kum kane ka rai ba eh.
Kaba nyngkong ka sorkar ka la dei ban pynsangeh shuwa ia ka kam pynlutphut ia ka pisa jong ki paidbah, ka sorkar ka la dei ban weng noh ia ki political appointees ki ba kynthup ia u Chairman, Co-chairmen, vice chairmen hapoh ki boards bapher bapher bad ki Corporations bad ruh ka sorkar ka dei ban weng noh ia ki Political Advisers.

Kaba ar ka long ba ka sorkar jylla ka dei ban tehlakam ia ka jinglaittuh jong ka khajna (leakages in revenue collection). Ka jingbym lah jong ka sorkar jylla ban tehlakam ia ka kam khaii beain ia u dewiong (illegal transportation of coal) ka la wanrah ka jingkyrduh ka ba khraw ha ka jingioh lum khajna jong ka sorkar jylla bad ka wan rah ruh ia ka jingduhnong ia ka pla jong ka sorkar bad la ong ruh ba ka sorkar ka khlem lah ban bud pyrkhing katkum ka ain (adopt strict Austerity Measures) ban pynthikna ba kan ym don kano kano ka jingpynlut phut ia ka pisa jong u paidbah.