Khot u Bah Prestone Tynsong ia u Mukul Sangma, ban iakhun elekshon pyrshah na Pynursla

Shillong:Ha ka thma ktien kaba la long hapdeng u Symbud Myntri Rangbah ka jylla, u Bah Prestone Tynsong bad u nongialam pyrshah ka sorkar u ba dei ruh u nongialam jong ka seng Congress, u Mukul Sangma, ha kaba une u nongialam jong ka seng Congress u la ong ba la don ka jingtih beain ia u mawshun bad la don ruh ka jingshalan tuh ia ki masi ha ki thain Pynursla kaba dei ka konstitwensi jong u Bah Prestone Tynsong.

U Bah Prestone Tynsong u la ong ha ki lad pathai khubor, “Ngin shah bad ailad ia u ba un wan ban iakhun elekshon pyrshah ianga na ka konstitwensi jong ka Pynursla lada u sngew kit khlieh bad sngew khia eh ia kita ki kam beain ba u la ong bad lada um lah ban pynshai ia kita ki jingkynnoh ki jong u, kata kam long kaba dei. Kumta, nga kyrpad ia u ba un iakhun na Pynursla lada u sngew ba nga leh shibun ki kam beaiñ ha ka konstitwensi ka jong nga, te ngin ailad ia u ba un iakhun pyrshah bad nga. Ngam don jingthut eiei ruh em hynrei um dei ban kren kat shaba lap ba shem khlem ka jingpyrkhat khamtam eh haba u dei u wei na ki nongialam uba radbah jong ka liang pyrshah, nga sngew kata ka jingkren ka jong u ka long kaba bakla eh. Lada nga kynnoh ia u ba u donkti ha ki kam beain ha Ampati lane ha Mahendraganj, un sngew kumno halor kata ka jingshah kynnoh ka jong u.”